-Almmuhus-
-Almmuhus-
OĐĐASATNuorra dievdu duššai biila­lihkuhis­vuođas

Nuorra dievdu duššai biila­lihkuhis­vuođas

-

-

Guokte olbmo leigga biillas mii vujii badjel luotta Deanus mannan ija. – Dat bávččaga jurddašit dan dili birra mas bearrašat leat dál, lohká Deanu gieldda sátnejođiheaddji Helga Pedersen.

Duorastaga iđđesija, birrasii diibmu 03:30, ožžo politiijat dieđu biilalihkuhisvuođa birra Oarjjit Sieiddás, birrasii guokte kilomehtera davábealde Deanušalddi. Biila, mas ledje guokte olbmo, lei jorihan birra ja fierran badjel luotta. Sihke politiijat, ambulánsa ja buollinveahka bohte lihkuhisvuođabáikái.

Operašuvdnajođiheaddji Bjørn Tormod Syversen muitala ahte lihkuhisvuođas duššai okta nuorra dievdu ja nuorra nieida lea roasmmehuvvan. Nieida lea sáddejuvvon buohccivissui ambulánssain.

– Politiijat leat teknihkalaš guorahallamiid dahkame báikkis. Mii leat dutkame ášši ja politiijat galget gažadit vihtaniid báikkis, dadjá Syversen.

Operašuvdnajođiheaddji lohká politiijaid dál bargame oažžut oktavuođa Deanu gieldda heahtejoavkkuin.

– Ahkidis dáhpáhus

Deanu gieldda sátnejođiheaddji, Helga Pedersen, lohká dáhpáhusa ahkidin ja muitala duorastaga ovdagaskabeaivvi galgá gieldda psykososiálalaš heahtejoavku čoahkkanit ja bargagoahtit sin čuovvolemiin geain lea dárbu čuovvoleapmái.

– Min jurdagat mannet odne dan nuorra bártni lagamuččaide, bearrašii ja ustibiidda. Jurdagat mannet maid nuorra niidii gii lea sáddejuvvon buohccivissui. Dat lea máilmmi ahkidis dáhpáhus, dadjá Pedersen.

– Dat bávččaga jurddašit dan dili birra mas bearrašat leat dál. Jurddašan maid nuoraid ja ovttaahkásaččaid birra geat dal čohkkájit ollu jurdagiiguin ja dovdduiguin.

BIILALIHKUHISVUOHTA: – Mis ii leat ráđđi ovttage olbmo massit dáinna lágiin. Nuorat leat min divrasepmosat, sátnejođiheaddji Helga Pedersen Vuorkágovva: Silje Malene Varsi.
BIILALIHKUHISVUOHTA: – Mis ii leat ráđđi ovttage olbmo massit dáinna lágiin. Nuorat leat min divrasepmosat, sátnejođiheaddji Helga Pedersen Vuorkágovva: Silje Malene Varsi.

Pedersen ii loga gieldda heahtejoavkku vuos ollen árvvoštallat galget go rahpat skuvllaid dahje girku sidjiide geat dan dárbbašit ja háliidit, muhto lohká dakkár mearrádusaid boahtit beaivvi mielde.

– Heahtejoavku ii leat vel ollen árvvoštallat movt čuovvolit sin geat dárbbašit dan, muhto dat dahkko nu jođánit go bargagohtet dáinna áššiin, dadjá Helga Pedersen.

-Almmuhus-