Mii leat dál vuorbádan váldovuoiti ealgabivdogilvvus, ja vuoiti gal lei oalle movttat.
Mii leat dál vuorbádan váldovuoiti ealgabivdogilvvus, ja vuoiti gal lei oalle movttat.
– Yeees!! Lei got 5000 ruvnno?
Ávvira ealgabivdogilvvu váldovuoiti lea nu movttet telefungeažis ahte huikkáda vel, go gullá ahte son lea vuorbáduvvon váldovuoitin.
Kárášjohkalaš Mathias Kalstad (17) faskii ge de 5000 ruvnno árvosaš skeaŋkakoartta, man beassá geavahit Kárášjoga Sport1 gávppis.
Son lea skuvllas go Ávvir čuojaha sutnje, ja duogábealde gullojit earát maid ávvudeamin suinna.
Misiin vuittii
Ávvira ealgabivdogilvui bohte oktiibuot 31 ealgagova, ja mii lea vuorbádan váldovuoitit buohkaid gaskkas.
Mathias Kalstad searvvai guvttiin ealggain, ovttain vuotnjaliin mii dettii gaskkal 130 ja 150 kilo, ja misiin mii dettii birrasiid 60 kilo. Dáid lea báhčán Lásseváris, gos sin joavkkus lei bivdoguovlu.
Son lea snihkkárfágas oahppin Sámi joatkkaskuvllas, ja lea juste Mánnevárnjárggas snihkkemin go Ávvir dáhttu su muitalit mo lei fearan go bážii miesi mainna vuittii.
– Lei hui somá, beana lei mannan lovset ealgga, mannan lei moadde kilomehter duohkái ja áhčči ges vácci birra caggat dan. Mun vulgen ges jiena maŋŋái, njáhken sivvadit dohko ja de áicen ealgga, muitala Mathias.
Son lohká iežas guhkin oaidnán ealgga ovdal go bođii nu lahka ahte beasai báhčit.
– De gal váibmu cohkii oalle johtilit, čaibmá ieš.
(Ášši joatká gova vuolábealde)
Priváhtagovva
Ealgabivddus leamaš unnivuođa rájes
Mathias muitala ahte diet miessi lei goalmmát ealga man lea báhčán iežas eallinagis, muhto ealgabivddus gal lea leamaš dan rájes go lei mánná.
– Mun lean áhči čuvodan ealgabivddus unni rájes, lávii dalle jo hui somá. Hui somá maiddái go earát báhčet ealgga, nu ahte ealgabivdu gal mearkkaša munnje olu, čilge son.
Áigu geahčadit bivdobiergasiid
Dál go lea fasken vuoittu de ii leat geargan jurddašit vel maid dainna áigu oastit.
– Ferten vuos fitnat geahččamin mat doppe leat, soaittán oastit jáhka dahje skuovaid. Árvideames oasttán muhtin biktasa, dieinna ruđain han sáhttá máŋga diŋgga oastit.
– It go meidne bivdobiergasiid oastit?
– Já mes bivdobiergasiid fal, daid mun oasttán ge. Lean jurddašan ahte adnošii dakkár albma bivdinjáhkka, dakkár mii ii ráhkat jiena go lea njáhkamin, lohká son.
(Ášši joatká gova vuolábealde)
Priváhtágovva
Nissonolmmoš bážii losimusa
Ealgabivdogilvvus skeŋket maid vuoittu sutnje guhte lei losimus ealgga báhčán ja losimus ealga lei ge maid dat mii guhkimus eret Sámis lea báhččon, nammalassii Alaskaealga.
Dainna searvvai guovdageaidnulaš Máret J. Hætta, guhte lea báhčán ealgga Noatak báikkis Alaskas ja ealga dettii birrasiid 400 kilo ja das ledje 24 sárggi.
Nu šaddá ge Máret Ávvira ealgadronnegin, son oažžu gaibagahpira mas čuožžu ahte lea ealgadronnet, dasa lassin oažžu t-báiddi ja mátketelefonveaskku man Finnmárkkuopmodat FeFo lea skeŋken gilvui.
Mii eat fáhten su ságaide dán áššis.
Mii sávvat lihkku vuoitiguktui ja giitit buohkaid geat serve!
