Lei 57 jahkásaš Morten Ruud guhte duššai go gyrokopter mas ledje guokte olbmo gahčai Gilbbesjávrris davvi-Suomas ikte eahkes. Nubbi almmái, guhte ii roasmmahuvvon bahuid, dolvojuvvui Romssa Universitehta buohccivissui.
Finnmárkku politiijat ožžo dieđu lihkohisvuođa birra diibmu 18 lávvordaga. Suoma politiijat dat guorahallet lihkohisvuođa, čállá Finnmárkku politiijaguovlu preassadieđáhusas. Politiijat eai vel dieđe manne gyrokopter gahčai.
Ikte eahkes váile gávccis duođaštuvvui ahte okta olmmoš lea duššan, ja nubbi ii leat bahuid roasmmahuvvon gyrokopterlihkosvuođas Gilbbesjávrris, dán čálii NTB.
Jođus Leavnnjas Stáigui
Gádjunguovddáš čállá Twitteris ahte gádjunbarggus ovttasbarget Suoma gádjunbálvalusain, ja guokte Norgga ambulánsahelikopterat leat jođus báikái. Gádjunveagas lei oktavuohta nuppiin olbmuin mii lei helikopteris mii gahčai, muhto gulahallan dáhpáhuvai heajos mobiillalinnjáin, čálii VG.no.
– Nu go mii diehtit de galgá gyrokopter leat girdilan Leavnnjas Finnmárkkus, ja galgá leat leamaš jođus Stáigui Nordlándii, muitalii Lars Nedrevåg HRS, Davvi-Norgga váldogádjunbálvalusas ifinmmarkii.
Barggai journalisttan
Morten Ruud lei eret Leavnnjas, muhto orui ja barggai Álttás.
Jagi 2013:s son virgáiduvvui NRK Finnmárkku guovlludirektevrain go ođđa guovllukántuvra ásahuvvui Áltái.
Morten Ruud álggii bargat Radio Porsangeris 1984:s. Dan maŋŋel barggai Finnmark Dagblad áviisas logi jagi gitta dassážii go son bargagođii Moskva-korrenspondeantan NRK ovddas 2007 gitta 2010 rádjai. Dán čállá NRK Finnmark.