Regiovdna Norrbotten dieđiha ahte koronadilli Davvi-Ruoŧas lea buoret dal.
Guokte koronabuohcci eaba dárbbaš intensiivadivššu vuoigŋanmašiinnas šat. Dat mearkkaša ahte ii leat oktage koronabuohcci intensiivadivššus Norrbottena leanas dal. Dát ii leat geavvan dan rájes go korona njoammugođii leanas, dieđiha Regiovdna Norrbotten.
– Dál mis leat guhtta koronabuohcci buohcceviesus, muhto ii oktage dárbbaš intensiivadivššu. Dat lea illusáhka dadjá Jonas Hansson, sadjásaš njoammuneastadandoavttir leanas.
1604 olbmos leat dieđihuvvon koronadávda Norrbottena leanas. Olles leanas orrot 250 497 olbmo.
– Koronanjoammun logut njidjet dađi mielde. Muhto lea ain deaŧalaš bissut ruovttus jus leat dávdamearkkat, ja doallat gaskkaid eará olbmuide ja čuovvot Álbmotdearvvašvuođaeiseválddiid rávvagiid čilge Jonas Hansson.
86 olbmo leat dieđihuvvon jápmán koronadávdii Norrbottena leanas dan rájes go korona njoammugođii.
