Mannan dálvvi leat duođaštuvvon 12 čivgama Norggas ja riikarájá alde, vihtta dušše Norggas ja čieža Norgga-Ruoŧa rájá alde. Gumpenálli lea danin badjel nationála gumpenáli meari nu mo Stuorradiggi lea mearridan, dieđiha Rovdata, mii vakšu boraspiriid Norggas.
Dat boađus almmuhuvvui mannan dálvvi gumpevákšuma ođđa raporttas. Rovdata lea bálkáhan Innlandet allaskuvlla ráhkadit raportta duođaštuvvon ja kártejuvvon gumppiid birra vákšunáigodagas golggotmánu vuosttaš beaivvis gitta njukčamánu 31. beaivái. Oktiibuot leta 109-114 gumppe siskkobealde Norgga vákšunáigodagas. Diibmá ledje 99-103 gumppe. Dál leat 85-90 gumppe Norggas.
Eambbo čivgamat go mearriduvvon
Leat duođaštuvvon gumpečivggat, šaddan 2020:s gumpeguovlluin Hornmoen, Kynna, Bograngen, Mangen ja Aurskog Mátta-Norggas. Gumpečivggat šaddan 2020:s lea maid duođaštuvvon dan čieža rádjáguovllus Varåa, Ulvåa, Juvberget, Kockohonka, Kymmen, Rømskog ja Boksjø. Stuorradiggi lea mearridan ahte nationála gumpenáli mihttomearri leat 4-6 gumpečivgama Norggas ja riikarájá alde. Golbma čivgama galget Norggas. Maiddái čivgamat olggobealde gumpeguovllu galget mielde. Gumpečivgamat Norgga-Ruoŧa rájá alde rehkenastojuvvojit 0,5 faktoriin.
– Go juohká čivgamiid rájá alde, de lea boađus 8,5 čivgama Norggas ja eambbo go Stuorradiggi lea mearridan, lohká Rovdata jođiheaddji Jonas Kindberg ja muitala gumpelohku lea bisson dássidis dásis maŋimuš jagiid.
