Ođđa dutkamis lea čoahkkáigeassu mo Norggas lea johtolatsihkkarvuohta, go mihttu lea ahte ii oktage galgga duššat johtolagas. Unnán mánát duššet johtolagas, sihkkarvuođa dihte.
– Mis leat alla mihttut, ja mii eat olat buot mihttuid maid bidjat. Muhto deháleamos johtaleaddjit leat mánát, ja daid mii dávjá gádjut. 1969 rájes, go mánáid bidje veallut maŋŋebeŋkii ja 103 máná dušše, gitta 2019 rádjái goas ii oktage duššan, lea dáhpáhuvvan juoidá. Leat unnán mánát mat duššet johtolagas Norggas. Mii sáhttit giitit johtaleaddjiid dan ovddas, go leat čeahpit šaddan sihkkarastit mánáid biillas, muitala Statens vegvesen johtolatsihkarvuođadirektevra Guro Ranes, preassadieđáhusas.
Mihttu ahte mánát eai galgga duššat
Eurohpás lea áibbas eará dilli. Doppe leat 6000 máná duššan johtolagas maŋemuš 10 jagi. 3000 dain dušše go eai lean albma ládje sihkkarastojuvvon biillas.
Jus mánát duššet johtolagas Norggas, de dáhpáhuvvá dat go leat vázzimin dahje sihkkelastimin. Dán rádjai 2022:s leat guovttis duššan vázzin- dahje sihkkelastinlihkohisvuođas.
– Mii eat háliit massit ovttage, ja mis lei ge mihttu ahte unnimusat okta jahki galggai nu ahte ii oktage mánná duššan johtolagas gaskkal jagi 2018 ja 2021. Dan mii nagodeimmet 2019:s. Mihttu gaskkal 2022 ja 2025 lea ahte mis galget unnimusat guokte jagi nu ahte mánát eai dušša johtolagas. Dán mihttu mun jáhkán mii olahit, čilge Ranes.
Oahpahit mánáidgárddiin ja skuvllain
Go nullavišuvdna álggahuvvui 2001:s de lei jurdda bidjat eambbo fokusa johtolatlihkohisvuođaide mas mánát leat mielde. Mánát eai lean doarvái sihkkarastojuvvon biillain, eaige lean áibbas oadjebasa luoddaguorain. Álgo 2000-logu dušše birrasii 20 máná johtolagas juohke jagi.
– Trygg Trafikkas lea váldoovddasvástádus veahkkin oahpahit mánáidgárddiide ja skuvllaide. Ja mii, ovttas fylkkagielddain ja gielddain, bargat dan ovdii ahte galget doaibmabijut skuvlageainnus maid. Váhnemiin ja biilaproduseanttain lea maid ovddasvástádus. Fárrolaga mii bargat dan ovdii ahte unnidit mánáduššama johtolagain. Mihttu lea ahte mii galgat oaidnit nulla logu fas, nu mo dagaimet 2019:s, loahpaha Ranes.
