Ráđđehus čavge sin dálkkádatmihtu, ja lea áigumuš čavget unnimus 50 proseanttain ovdal jagi 2030, muhto rahpet vejolašvuohta čavget vel 55 proseanttain.
Dálkkádat- ja birasgáhttenministar Sveinung Rotevatn, ruhtadanministtar Jan Tore Sanner ja mánáid- ja bearašministtar Kjell Ingolf Ropstad ovdanbukte iežaset ođđa dálkkádatmihtu bearjadaga guovvamánu 7. beaivvi. Sivvan manne ođđa dálkkádatmihttu lea almmuhuvvon lea go ON lea bidjan guovvamánu 9. beaivvi áigemearrin ovdanbuktit nationála dálkkádatmihtuid, ja dat mearrádus dahkkui Parissoahpamuša oktavuođas 2015:s.
Norggas lea dál mihttu ahte dálkkádatgássaid nuoskkideapmi galgá geahpiduvvot 40 proseanttain 1990-dásis ovdal jagi 2030, ja das Norgga ovttasbargá EU:in. Norga dieđihii dán mihtu ON:i geassemánu 2016 ja dat nannejuvvui lága bokte jagi maŋŋá. Mihtu ferte dál čavget 50 proseanttain, muhto das galgá maid vejolašvuohta lasihit mihtu 55 prosentii, dieđiha NTB.
