Dálkkádataktivista Greta Thunberg ii áiggo šat oassálastit skuvlastreaikkas juohke bearjadaga. Maŋŋel 251 vahkku streaikkain, de lea son loahpahan skuvlavázzima.
– Go streikegohten 2018:s, de in goassege jáhkkán dan mielddisbuktit maidege. Maŋŋel go streikejin juohke beaivvi golbma vahkku, de leimmet unna jovkkoš mánát geat mearrideimmet joatkit juohke bearjadaga. Dan barggaimet mii, ja nu šattai Fridays for Future, čállá Thunberg Twitteris.
Dan rájes lea Thunberg šaddan ovttain máilmmi dovdoseamos dálkkádataktivisttain, muhto son ii heaitte demonstreremiin.
– Mii geat sáhttit hállat, leat geatnegahtton bargat dan. Vai sáhttit rievdadit visot, de dárbbašat buohkaid. Mun joatkkán demonstreremiin bearjadagaid, vaikko teknihkalaččat ii leat skuvlastreaika. Mis ii leat eará vejolašvuohta go bargat buot maid sáhttit. Dáistaleapmi lea aiddo álgán.
