Nordlándda fylkka 41 gielddas leat guhtta gieldda dál biddjon ROBEK-registarii. Leat olu sivat manin gielda biddjo dan listui. Vuosttamuš lea go gielddas ii leat ekonomiijalaš dássedeaddu.
ROBEK –register om betinget godkjenning og kontroll dahje registtar mii eaktuda dohkkeheami ja dárkkisteami. Riikaviidosaččat ledje skábmamánu 2021 loahpas oktiibuot 18 gieldda ovcci fylkkas mat ledje biddjon registarii. Nordlánddas leat eanemus gielddat dan registaris: Nesna, Træna, Fuoskko, Lodegat, Moskenes ja Hápmir. Gielddat mat leat biddjon ROBEK:i leat šaddan stáhta háldui mii dárkkista jahkebušeahta, loana váldima ja guhkes áiggi soahpamušaid.
– Min bargu lea čuovvolit ROBEK-gielddaid sihke bagadallamiin ja rávvemiin. Dat bargu dahkko sierra fierpmádaga bokte mii lea ásahuvvon gielddaid várás ovttasráđiid KS:in. Fierpmádagas leat čoahkkimat gos gieđahallet politihkalaš jođihangotti, álbmotválljejuvvonoahppu ja ekonomiijastivrema, čilge Nordlándda Stáhtahálddašeaddji gieldda- ja gearggusvuođaossodaga seniorráđđeaddi Monica Antonsen preassadieđáhusas.
Olu sivat
Nordlándda 2010 raporttas, mii ain lea áigeguovdil, čujuhuvvo go ássiidlohku njiedjá, de lassánit juohke ássi doaibmagolut ja ekonomiija manná heajut guvlui. Goluid dássi ii leat heivehuvvon tietnasii. Ássiidlohku ja eanet boares olbmot geat dárbbašit váikkuhit gieldda bursii. Politihkalaš sealggahisvuohta lea dávjá dehálamos čilgehus. Heajos gielddaekonomiija ii boađe fáhkka, muhto lea máŋgga jagi boađus.
Antonsen muitala sii geavahit daid čuoggáid raporttas ásahan dihtii dálá duohta dili áddejumi, sihke politihkalaččat ja hálddahuslaččat. Maiddái dan ahte čovdosiid galgá vejolaš čađahit ja gean ovddasvástádus lea daid áššiid fuolahit.
