Sullii 60 000 nissona Norggas šaddet áhpeheapmin jahkásaččat, ja sullii 5000 dáin gillájit deprešuvnnain áhpehisvuođas. Dušše bealli sis geavahit dálkasiid deprešuvnna vuostá.
*/
Dávjá geavahit áhpehis nissonolbmot unnit dálkasiid deprešuvnna vuostá go maid doavttir lea ávžžuhan, danne go ballet ahte dat sáhttá vahágahttit ogi.
Dál čájeha ođđa iskkus ahte áhpehis nissomolbmot oadjebasat sáhttet geavahit dálkasiid deprešuvnna vuostá árrat áhpehisvuođas.
– Iskosis mas leat iskan eambbo go 8000 nissonolbmo geat gillájedje deprešuvnnain ovdal go šadde mánáidládjiin dahje áhpehisvuođas, ja iskan sin mánáid vihtta jagi maŋŋel. Boađusin iskosis lei ahte mánáin ii gávdnon vuoiŋŋamašvihki, ii ge lean billahuvvan nearvavuogádat, muitala doavttir Angela Lupattelli.
Sáhttá várálaš váldit badjelmeare olu dálkasiid áhpehisvuođa loahpageahčen
Vaikko ohki ii vaháguvvo daid dálkasiid geažil árrat áhpehisvuođas, de leat iskosis maiddái gávnnahan ahte ii leat buorre váldit dálkasiid deprešuvnna vuostá čađat olles áhpehisvuođas.
– Mii leat gávdnan dávdamearkkaid gávccičuođi mánás geain eatnit leat geavahan SSRI-dálkasiid loahpageahčen áhpehisvuođa, dadjá Lupattelli.
Fertejit dutkat dárkileappot ovdal go celket maide
Dutkit eai leat dattetge gávnnahan lea go čanastat eatni SSRI-dálkasiid geavaheamis loahpageahčen áhpehisvuođa ja máná láhttenvuogis.
– Deháleamos lea ahte nissonolbmot ožžot buoremus lági mielde dieđuid ja máhtu dan birra ahte geavahit dálkasiid áhpehisvuođas, nu ahte sáhttet ovttasráđiid doaktáriin diđolašvuođas válljet maid galget dahkat. Eat sáhte ovdal go leat iskan dán albmaládje dadjat ahte nissonat eai galgga váldit dálkasiid deprešuvnna vuostá áhpehisvuođas, lohká Lupattelli.
(NTB)
