Čalmmehis olbmot leat guovtti ja golmma geardde eambbo hearkkit deprešuvdnagillámušaide go muđui álbmot, čájeha dutkan.
Dutkamii man NKVTS (Nationála máhttoguovddáš veagalváldimis ja traumáhtalaš streassas) lea čađahan leat searvan 736 rávesolbmo geat leat badjel 18-jahkásaččat. Bealli oasseváldiin leat riegádan čalmmeheapmin, ja nubbi bealli lea massán oainnu mánnávuođas dahje rávis agis.
– Leat earenoamážit sii, geat leat nuoramus ahkejoavkkuin, geat vásihit deprešuvnna. Olles 14 proseantta ahkejoavkkus geat leat vuollel 50-jahkásaččat gillájit duođalaš deprešuvnnain. Dat lea mearkkašahtti eambbo go muđui álbmogis, gos gaskkal 4 ja 8 proseantta vásihit deprešuvnna, dadjá dutki Andun Brunes, gii lea čađahan dutkama.
Eambbo go ovttas logi oasseváldis leat nu stuorra psyhkalaš váttut, earret eará váttut čatnon deprešuvdnii, ahte háliidit čujuhusa psykologii.
Dutkan maid čájeha ahte oallugat eai oaččo dan dearvvašvuođaveahki masa lea dárbu, ja 60 proseantta vástidedje ahte váillahit lagas gaskavuođaid ja 40 proseantta vástidedje ahte sii dovdet olgguštuvvon sosiála fierpmádagain.
©NTB
