Gjerdrum uđas dagaha 900 miljovnna ruvdnosaš luondduvahátbuhtadusa. Dat čájehuvvo meroštusas man leat dahkan Finans Norge ja Norsk Naturskadepool.
Danne go ii leat golihan guhkes áigi uđđasa rájes, leat logut ain eahpečielgasat, dieđiha Finans Norge.
– Buhtadusmeroštallan rievdá ain go diehtit viidodaga vahágis. Sáhttá ádjánit ovdal go tákstaolbmot besset guvlui, dadjá Finans Norge gulahallanhoavda Stine Neverdal preassadieđáhusas.
31 ássanovttadaga oktiibuot ovcci visttis váldojedje uđđasii. Badjel duháha olbmo evakuerejedje uđđasa maŋŋel. Čieža olbmo leat gávdnon duššan. Jáhkket golbma olbmo vel leat duššan, muhto eai leat vel gávdnon.
Sáhttá ahte guovllus eai beasa šat ássat
Politiijat ožžo dieđu uđđasa birra diibmu 3.59 gaskavahkku ija juovlamánu 30. beaivvi. Norgga čázádat- ja energiijadirektoráhta (NVE) dieđuid mielde lea uđas 700 mehtera guhku ja 300 mehtera govddu.
Dasa lassin viesuide mat váldojedje uđđasii leat olu eará viesut ja visttit lahkosis maid biliduvvon, ja lea dássážii eahpečielggas gieldda bealis guđiin guovlluin uđđasa birrasis eai sáhte olbmot šat ássat.
Lassin eará visttiid vahágii lahkosis,de boahtá lassin buhtadus eará materiálavahágiidda, nu go biillaide.
Gokčet viessoláiggu gaskaboddosaš orrunsadjái
Finans Norge dieđiha ahte buhtadusfitnodat lea bures boahtán johtui veahkehit sin geat fáhtehalle uđđasii.
– Evakuerejuvvon olbmot gulahallet buhtadusfitnodagaiguin ja ožžot earret eará ruđa buhtadusfitnodagain oastit dárbbašlaš dávviriid, dasa lassin gokčet viessoláiggu gaskaboddosaš orrunsadjái dan áigodagas go leat gohččojuvvon evakueret, dadjá Neverdal.
Oallugat leat ožžon láigobiilla go sin biillat eai sáhte vižžot uđasguovllus.
Sivva uđđasii ii leat oahpis, muhto galgá dutkojuvvot.
(©NTB)
