Diibmá čađahuvvojedje badjelaš 11 000 abortta ja ná vuollin eai leamaš abortalogut goassege.
Oktiibuot čađahuvvojedje 11 081 abortta 2020:s, ja ná vuollin ii leamaš abortalohku goassege, čájehit Abortaregistara logut.
Abortaloguin lea čanus diimmá riegádahttinloguin, dalle šadde dušše 52 979 máná Norggas.
– Abortalogut njidjet buot agiin, muhto eanemus lea njiedjan nissoniid searvvis geat leat vuollel 25 jagi boarrásat, lohká Abortaregistara váldodoavttir Mette Løkeland-Stain.
Jagi 2000 čađahuvvojedje 14 675 abortta ja dat lea badjel 3500 eanet abortta go diibmá. Koronagáržžidusat maid dagahit ahte abortalogut njidjet.
– Koronagáržžidusaid dihte lea unnit ovttastallan ja dat sáhttá maid dagahit ahte abortalogut njidjet. Muđui han gal maid sáhttet eambbosat válljen čađahit áhpehisvuođa vaikke eai lean plánen oažžut máná, muhto diesa eat oaččo čielgasa ovdal go dán jagi riegádahttinlogut almmuhuvvojit, lohká Løkeland-Stai.
Son dadjá maid ahte váldosivva aborta njiedjamii lea ahte nuorat leat maŋimuš jagiid šaddan čeahpit geavahit prevenšuvnna ja dán dábi doalahit maiddái ollesolmmožin.
(@NTB)
