-Almmuhus-
SMÁVVAOĐĐASATNisson­olbmot  40+ leat menddo várrugasat go čierastit

Nisson­olbmot  40+ leat menddo várrugasat go čierastit

Journalista

-

-

Dálveluomus lea stuorát riska doadjit gieđaid ja julggiid. Albmát čierastit menddo jođánit slalomluohkás, rávis nissonolbmot fas čierastit menddo njozet luohkás go čuiget, váruha dáhkádusfitnodat If.  

Norggas roasmmehuvvet eanemus dálveluomus, eanet go Nuortariikkas, Sveitsas ja Tuiskkas, erenoamážit gaskaahkásaš rávis nissonolbmot ja nuorra ja rávis albmát. Logut dáhkádusfitnodagas čájehit ahte gaskal 40–50-jahkásaš nissonolbmuin lea beali stuorát riska roasmmehuvvat go seamma ahkásaš albmáin. 

– Gaskal 40–60-jahkásaš nissonolbmot roasmmehuvvet dávjjibut go čuiget go leat menddo várrugasat. Hui dábálaš lea ahte sii illá dustet čierastit, ja go gahččet, de gahččet ovddosguvlui. Olusat eai jurddaš ahte lea váddásut stivret sabehiid go čierastit njozet, lea álkit go johtilabbot čierastit, lohká If gulahallanneavvu Ellen Paulsen preassadieđáhusas.

Lohká dábálaččat dodjet sii giehtalađđasa dahje gieđa bajábealde gargŋila. Easkkaálgit fas dodjet alimiid ja čoarbbealdávtti.  

Gaskal 15–20-jahkásaš dievdduin lea golmma geardde stuorát riska roasmmehuvvat dálveluomus go seamma ahkásaš nieiddain. 

– Nuorra albmát dustet eanet go dan maid máhttet ja dávjá lea sis menddo stuorra leaktu ja danin sáhttet sii doadjit gieđaid, julggiid ja čielggi. Maiddái gaskal 30–40-jahkásaš albmát meddet go eai nagot árvvoštallat iežaset fámuid, dávjjimusat roasmmehuvvet go eai čuovo gárvves láhtuid, lohká Paulsen.

Ráva

Son rávve rávisolbmuid muitit ahte sii eai leat šat nu lášmadat go nuorran ledje. Lohká gievrudanhárjehallan nanne sihke dákterikki, dehkiid ja lađđasiid ja eastada vahágiid. Čuoigan ja čierastallan eai soabat alkoholain, muhto dat váikkuha mátkedáhkádussii jus roasmmehuvat. Lihkohisvuođadáhkádus máksá vahátdikšuma ja buhtadusa jus lápmašuvvá.

-Almmuhus-