Dán váhkkoloahpa vurdet olu borgga mii mielddisbuktá stuorit muohtauđasvára.
Muohtauđasváruhusaid jođiheaddji Heidi Bache Stranden Norgga čáhcádat- ja energiijadirektoráhtas dieđiha NTB:ii ahte dál sáhttet uđđasat luovvanit Davvi-Norggas. Garra riđđu ja stoarbma, oktan garra muohtaovttiiguin, dagaha ahte sii árvvoštallet stuora muohtauđasvára.
– Šaddá maid eanet várra vahkkoloahpas, earenoamážit lávvordaga, muitala Stranden ja ávžžuha garvit vuolgit várrečohkaide de.
– Jus juo fertet vuolgit, ale mana dohko gos lea eanet go 30 gráda ceakkus ja gos dieđát sáhttá luovvanit muohtauđas, dadjá Stranden NTB:ii.
Leat sáddejuvvon fiskes várrevárehusat Nordlándii, Romsii ja riddoguovlluide Oarje-Finnmárkkus. Lávvordaga rájes vurdo ollu muohta, ja orjješdavádat čavgá. Biilavuoddjit fertejit vuodjit várrogasat, dieđiha NTB.