Okta nana bákti ja sámisáŋgár lei vádjolan eret sámesearvvodagas ja guođđán min morrašii.
Ráhkis bearaš /Kjære familie Fuolkkit/ Slekt Morašteaddjit/ Sørgende Searvegoddi/ Menighet
Kárášjoga Sámiid Searvvi beales hálidan dadját moadde sáni Arne muitui. Mannan vahkus go oaččuimet dieđu Arne lei jápmán, šattai moraš ja ahkkitvuohta, eat lean gal vuordán son dál juo jápmá. Min jurdagat manne su bearrašii: Eamiđii Piai, mánáide Finn Arnii, Rávnái, Ritvai , Hellii ja, su vieljaide, oappáide ja sin bearrašiidda.
Okta nana bákti ja sámisáŋgár lei vádjolan eret sámesearvvodagas ja guođđán min morrašii. Mii gal boahtit váillahit su, muhto mis leat ollu buorit muittut sus ja su bargguin.
Arne beroštii sámepolitihkalaš áŋgiruššamiin ja lei Kárášjoga Sámiid Searvvi miellahttu dan rájes go son fárrii fas ruovttoluotta Kárášjohki, maŋŋel go gearggai Universitehtas lohkamin. Arne lei NSR miellahttun álggu rájes go NSR vuođđuduvvui1968, go son lei maid mielde vuođđudeamen Bergen Sámiid Searvvi 1969. Son lei maid Kárášjoga Sámiid Searvvi jođiheaddji 1984-85 ja muđuid stivrras maŋŋel. Son lei hui áŋgiris ja berošteaddji miellahttu, ja loktii áigeguovdilis áššiid searvvis.
Arne lei maid Kárášjoga gielddastivrra áirrras Sámelistta ovddas máŋga válga áigodaga 1980- lot logus. Son barggai hui buori barggu gielddastivrras. Dan áigge lei hui dehálaš ahte gielddastivraáirasiin ledje čielga sámi árvvut ja oainnut, go máŋga stuorra ja dehálaš sámi áššit galge gieđahallot ja meannuduvvot almmolaš orgánain.
Sámegiella, sámeskuvla, historjá ja eananvuoigatvuođa áššit ledje guovddážis su politihkalaš barggus. Son maid barggai bures skuvlaáššiiguin oahpaheaddjilihtu ja NSR bokte, ja mii leat hui giitevaččat dan barggus maid son dagai.
Arne lei nana politihkkár, ja sus ledje čielga sámepolitihkalaš árvvut ja oainnut. Son vurddii ollu ovttasbargu politihkalaš guimmiin, son lei hui njuolggočoalat ja celkkii mii lei dárbu.
Son lei hávskás olmmoš ja suinna sáhtii háleštit buot áššiid birra ja lei somá searvvostallat suinna.
Arne beroštii hui ollu iežas bearrašis, ja áinnas čájehii addjubiid ja máttarmáná govaid.
Kárášjoga Sámiid Searvi atná Arne Nystad ovdagovvan ja mii boahtit váillahit su.
Giitit du go movttiidahttet sámepolitihkalaš bargguide ja dorjot daid, ja oahpahit nuoratgeardái sámevuohta lea dehálaš.
Loahpas lohkat: Divtta man Áillohašl, Nils Aslak Valkepää lea čállán «Nu guhkin dat mii lahka» (1994 DAT)
Duoddariinnat – ija bealit Biekkus duoddarat – vuorbin Ija bealitnai – go galgá Jierastuvvan – jaskkodan Go galgá, – de galgá
Ráfi lehkos Arne muitui ja vuoiŋŋat ráfis Hearrá hálddus
Kárášjohka 01.07.22
