Eanadoallo- ja biebmoministtar Geir Pollestad (Guovddášbellodat) ložže duođaštangáibádusa go luondu lea vahágahttán boanddaid buvttadeami ja go dál sáhttá stáhta juolludit 70 proseantta das ovddalgihtii.
Hirbmat olu boanddat Norggas leat gillán sihke goikkádaga ja dulvvi. Eanadoallo- ja biebmoministtar Geir Pollestad galledii Álttá mannan duorastaga ja beasai ieš oaidnit goikkádaga váikkuhusaid.
– Goikkádat Davvi-Norggas buktá dieđusge eahpesihkkarvuođa olu boanddaide ja vuorjašuhttá sin eanadoalu ektui. Dan mun ge dagan. Media lea eanaš vuoruhan dulvvi máddin, muhto mu mielas galgat mii maid oaidnit Davvi-Norgga boanddaid, lohká Eanadoallo- ja biebmoministtar Geir Pollestad preassadieđáhusas.
Leat stuorra erohusat Davvi-Norggas man garrasit goikkádat lea čuohcan šaddui, sihke riikkaosiin, siseatnamis ja báikkálaččat. Orru leamen doarvái roavvafuođar, muhto šaddá hástalus dan juohkit. Juohke boanda árvvoštallá ieš makkár fuođđardilli ja molssaevttolaš fuođđarat sus leat. Goikkádat davvin buktá stuorra hástalusaid go leat guhkes gaskkat ja divrras fievrredeapmi.
Lea vejolaš oažžut gitta 50 proseantta máksojuvvot dan vurdojuvvon badjelbáhcaga ortnegis, muhto ministtar lasiha dan 70 prosentii 2023 šaddojagi. Dát gusto olles riikii. Eanadoallo- ja biebmoministtar ložže maid vahátduođaštangáibádusa luondduvahátortnegis, dát gusto dulvevahágiidda borgemánus.
