Hurtigruten MS «Spitsbergen» fanas lei jođus Svalbárdii, muhto šadde jorggihit go Svalbárdda áššeolmmái gilddii káijii bidjat fatnasa.
Fanas lea dál jođus Romsii, go eai beassan Svalbárddas káijii bidjat fatnasa. Dál, go fanas olle Romsii, de galget buohkat fatnasis váldit koronaiskosa, fatnasa guossit ja bargit eai beasa guođđit fatnasa.
Fanas ii beasa Romssa káijii boahtit ovdal go Romssa suohkan diehtá ahte sis lea vejolašvuohta gieđahallat iskkusáldima ja njoammunguorrama.
– Buohkat galget erremis fatnasis, dasto galget váldit iskosiid. Ii oktage beasa guođđit fatnasa ovdal go iskosiid vástádus boahtá. Jus leat positiiva iskosat, de fertet árvvoštallat ođđasit errema oktavuođas, muitala Romssa suohkana suohkandoavttir Kathrine Kristoffersen.
Mánnodaga duođastuvvui 40 olbmos koronadávda, buohkat ledje leamaš Hurtigruten «Roald Amundsen» fatnasis, 34 bargi ja guhtta mielčuovvu.
Dan čállá NRK sin neahttasiiddus.
