Golggotmánu 14. beaivvi dieđihedje badjel 60 proseantta Austrália álbmogis álbmotjienasteami bokte ahte sii eai háliit ahte eamiálbmogat dohkkehuvvojit vuođđolágas.
Dat mielddisbuktá ahte Austrália eamiálbmogat, aborigiinnat ja Torres Strait nuori álbmot, eai beasa ásahit alcceseaset ráđđeaddi čoahkkima, «Voice to Parliament».
Austrálias fertejit buot vuođđolága rievdadusat dohkkehuvvot álbmotjienastemiin. Eanetlohku Austrálias eai háliidan rievdadit vuođđolága dohkkehan dihtii eamiálbmogiid vai ožžot «Voice of Parliament». Dát vuoittáhallan lea čuohcan garrasit eamiálbmogiid jođiheddjiide ja lea bivdán ahte aborigiinnaid ja Torres-Strait-sulloálbmoga levget morašláhkai dán vahkku ja ávžžuhit maid austrálialaččaid searvat dasa, čállá Adresseavisen.no ja čujuha ntb:ii.
Vuođđolága rievdadus gáibida eanetlogu miehtá riikka ja eanetlogu njealji oassestáhtas. Dál buot guhtta oassestáhta hilgo evttohusa. Lei 1999:s go vuosttaš geardde lei dakkár álbmotjienasteapmi eamiálbmogiid birra.
– Lea oalle bahča ahte olbmot geat eai leamaš dán kontineanttas guhkit go 235 jagi, biehttalit dohkkehit álbmoga mii leamaš dáppe 60 000 jagi. Lea áibbas áddemeahttun, lohket Austrália eamiálbmogiid jođiheaddjit.
Austrálias leat 26 miljovnna olbmo ja 3,8 proseantta gullet eamiálbmogiidda. Eará riikkaid ektui, gos leamaš sullasaš historjá, nu go Kanada ja Ođđa Selánda, de ii leat Austrália formálalaččat dohkkehan dahje soahpan riikka eamiálbmogiiguin. 1700-logu rájes, go vuosttaš vilges álbmot bođii Austráliai, de lea eamiálbmot vuoigatvuođat ja dilli hedjonan mealgat. ON eamiálbmogiid vuoigatvuođa erenomášáittardeaddji, Jose Francisco Cali Tzay, logai ovdal jienasteami «Voice of Parliament» livčče veahkehan Austrália doalahit iežaset olmmošvuoigatvuođa geatnegasvuođaid. Lei Austrália stáhtaministtar Anthony Albanese gii lei lohpidan doallat dakkár jienasteami go vuittii válgga diibmá.
