– Mus lea stuora beroštupmi nannet ja seailluhit lullisámegiela ja kultuvrra. Dan dihte lean ilus go Plassje dál šaddá oassin sámegielaid hálddašanguovllus, dadjá gielda- ja ođasmahttinministtar Monica Mæland.
Plassje lea guovddáš guovlu lullisámegiela dáfus. Lullisámegiella lea klassifiserejuvvon duohta áitojuvvon giellan UNESCO áitojuvvon gielaid rukses listtus, ja lei ovtta gaskka várra ahte galggai oalát jávkat.
Muhto maŋemus jagiid lea leamaš positiivvalaš ovdáneapmi. Earenoamážit nuoraid gaskkas lea beroštupmi oahppat ja geavahit lullisámegiela lassánan. Vásáhusat eará suohkaniin, mat leat searvan hálddašanguvlui, čájehit ahte giella lea ožžon alit stáhtusa dain guovlluin.
Plassje suohkanstivra mearridii ovttajienalaččat ohcat ahte suohkan galgá šaddat oassin lullisámegiela hálddašanguovllus. Trøndelága fylkkasuohkan lea dorjon ohcama.
– Lea deaŧalaš ahte sámegiela ja sámi kultuvrra ovdánahttinbargu dahkko báikkálaččat ja doppe gos sámit orrot. Ráđđehus lea dan dihte positiivvalaš dasa ahte suohkanat ohcet lahttuduvvot hálddašanguvlui, dadjá gielda- ja ođasmahttinministtar Monica Mæland preassadieđáhusastis.
Guokte miljovnna ruvnno
Ráđđehus lea odne mearridan lahttudit Plassje suohkana Trøndelágas sámegielaid hálddašanguvlui suoidnemánu 1. beaivvi rájes dán jagi. Dát čuovvu ráđđehusa dáhtu ovdánahttit ja nannet lullisámegiela.
Evttohusas reviderejuvvon nationálabušehttii 2018 lea evttohuvvon lasihit juolludeami Sámediggái guvttiin miljovnnain gokčat lassigoluid. Jagi 2019 rájes juolluduvvo njeallje miljovnna ruvnno jahkásaččat.
Guoktenuppelohkái suohkana
Sámegielaid hálddašanguovllus leat sámegiella ja dárogiella ovttadássásaččat. Dain suohkaniin lea buohkain riekti beassat oažžut bálvalusa sámegillii go sii váldet oktavuođa almmolaš guovllu ásahusaiguin.
Ássiin leat maid eanet vuoigatvuođat oažžut oahpahusa sámegielas. Go Plassje dál lahttuduvvo hálddašanguvlui, de leat hálddašanguovllus oktiibuot guoktenuppelohkái suohkana Finnmárkkus, Romssas, Nordlánddas ja Trøndelágas.
Plassje lea njealját lullisámegielsuohkan hálddašanguovllus.
