Romssa universitehta (UiT) lea fállan skuvlasajiid 7512 ohccái dán čakčii.
Samordna opptak lea mánnodaga almmuhan našunála sisaváldinloguid Norgga universitehtaide ja allaskuvllaide. Dán jagi ledje 8657:s geat vuoruhedje UiT oahpuid ohcamušas, čieža proseantta eambbo go diibmá.
– Mii illudit vuostáiváldit visot studeanttaid čakčii. Lea hui illudahtti go nu oallugat áigot váldit oahpu máilmmi davimus universitehtas, ja mii ávžžuhit buohkaid geat leat ožžon fálaldaga váldit dan vuostá, lohká UiT oahpahusaid prorektor Kathrine Tveiterås preassadieđáhusas.
Váttis beassat profešuvdnaoahpuide
Nu movt diibmá ge, de lea dál nai váttis beassat profešuvdnaoahpuide.
Doavtterskuvllas lea oahppočuoggarádji 68,2, ja psykologaoahpus ges 66,5. Muđui ges leat odontologiijas 66 čuoggá, paramedisiinnas 63 čuoggá ja riektadiehtagis 61,4 čuoggá.
Seammás leat hirbmat guhkes vuordináiggit dáin oahpuin. Doavtterskuvllas leat 181 oahpposaji ja 1258 ohcci vuordinlisttus. Riektadiehtagis leat 150 oahpposaji ja 1574:s vuordinlisttus, ja psykologiijaoahpus ges 49 oahpposaji ja 1271:s vuordinlisttus.
Oallugat ohcet neahttaoahpuide
Dál leat eambbosat geat jearahit máškidis oahpuid, vai studeanttat sáhttet sihke bargat ja váldit oahpu oktanis.
– UiT oahput geasuhit feara makkár ohcciid. Dat guoská ge min strategiijai, mas mii deattuhit ahte sihke nuorra ja rávis studeanttat smávvá ja stuora báikkiin ožžot oahpuid ja gelbbolašvuođaid mat dárbbašuvvojit boahtteáiggis, lohká Tveiterås.
Neahttaoahpuin lea oahppočuoggárádji 46,7 jahkkeohppui jođiheamis. Dás leat 800 oahpposaji ja 3481:s geat leat dasa ohcan. Ekonomiija ja hálddahusa bachelorii neahtas lea oahppočuoggarádji 47,6. Dán oahpus leat 300 saji masa 1928:s leat ohcan.
UiT:s Álttás lea árktalaš meahcástallan masa eanemusat leat ohcan. Oahpus leat 20 oahpposaji ja 321 ohccit.
Áhkánjárggas leat eanemusat ohcan bachelorohppui inšenevran dihtorteknihkas. Dás lea oahppočuoggarádji 54,8, ja 40 oahpposaji masa 392:s leat ohcan.
Hársttáin leat eanemusat ohcan internašunála gearggusvuhtii. Oahppočuoggarádji lea 62, ja 40 oahpposaji masa 392:s leat ohcan.
Leat ain rabas oahpposajit
Vuođđoskuvllaid oahpaheaddjeoahpuin njidjet ohccit. Vaikko buot kvalifiserejuvvon ohccit leat ožžon oahppofálaldaga, de leat ain rabas oahpposajit dán oahpus sihke Hársttáin, Álttás ja Romssas.
Buohccidivššároahpuin oidno nai seammáládje geavvame, go lea dušše Romsa gos vuordinlistu lea biddjojuvvon johtui.
– Lea hástaleaddji go ii leat liikká allá beroštupmi dakkár oahpuide mat leat dehálaččat servodahkii. Dutkamat čájehit ahte sii guđet leat ohcan buohccidivššár- ja oahpaheaddjioahpuide UiT:s leat duhtavaččat dáid oahpuiguin, lohká Tveiterås, ja lasiha ahte lea vejolaš ohcat rabas oahpuide borgemánu 11. beaivvi rádjái.
