Birasdirektoráhta doaivu ođđa merddiin goddit eanaš ruoššaluosaid mat gorgŋejit Deanučázádahkii dán geasi. Miessemánu 24. beaivvi lágiduvvo álbmotčoahkkin Deanu šaldis dáid plánaid birra.
– Mii oaivvildat ahte lea vejolaš goddit merddiin eanaš ruoššaluosaid mat gorgŋejit Deanučázádahkii dán jagi. Seammás lea olu eahpesihkkarvuohta mii guoská dálkái ja čáhcejođádahkii ja man bures meardi doaibmá ja man olu ruoššaluosat gorgŋejit. Dieid lea váttis meroštallat ovddalgihtii, lohká Roar Sandodden gii jođiha Veterinearainstituhta prošeavtta Birasdirektoráhta ovddas, preassadieđáhusas.
Geahččalanjahki
Dan sivas go Deanučázádagas lea atlánttaluosas stuorra vejolašvuohta ahtanuššat ja go čázádagas lea stuorra čáhcejođádat, de lea liige hástaleaddji dárkkistit ja sirret eret ruoššaluosa jogas. Maŋimuš jagiid lea atlánttaluosat unnon mealgat ja dat dahká liige hástalussan sirret eret ruoššaluosaid.
– Deattuhan dát lea geahččalanjahki. Vaikko man olu ruoššaluosaid mii nagodat hehttet gorgŋemis johkii, de lea dehálaš iskat man bures dákkár meardi doaibmá Deanus. Dán prošeavttas lea maid ávki eará čázádagaide, lohká Birasdirektoráhta direktevra Ellen Hambro.
Gárvvis geassemánu 24. beaivvi
Jurdda lea ahte meardi lea doaimmas Sieiddásullo bokte, mii lea vulobealde Deanu šaldi, geassemánu 24. beaivvi. Birasdirektoráhta lea bálkáhan báikkálaš olbmuid cegget mearddi maid birrasii 30 olbmo ohppet dán geasi.
– Dákkár meardi ii leat ovdal huksejuvvon Norggas. Ieš meardi ja rusttegat čuoldit ja goddit ruoššaluosaid leat biddjon fávlái lahta ala, lohká Roar Sandodden.
Son muitala čáhcejođádat váikkuha dasa ahte goas lea dorvvolaš cegget mearddi ja doaimmahit dan beaivválaččat.
Diehtojuohkinčoahkkin 24.05.
Norgga luonddudutkaninstituhtta ja Suoma luondduriggodatinstituhtta vákšot videoin ja sonarain mo báikkálaš guollešlájat, nugo atlánttaluossa, láhttejit mearddi lahka. Meardi ii galgga muosehuhttit eará guollešlájaid. Birasdirektoráhta ja Veterinearainstituhtta lágidit rabas diehtojuohkinčoahkkima Norgga ja Suoma beale álbmogii miessemánu 24. beaivvi tiibmu 18–21 ja dat tulkojuvvo dárogillii jaa suomagillii.
