Eambbosat leat geavahišgoahtán šlođggona seavdnjadin. Trygg Trafikk doaivu ahte vel eambbosat váldet šleđggoniid atnui.
48 proseantta norgalaččain geavahit šleđggona go vánddardit seavdnjadin, čájeha 2022 Šleđggonlohkan. Šleđggongeavaheapmi lea lassánan guvttiin proseanttain ovddit jagi ektui.
– Mii illudit go šleđggongeavaheapmi lassána veahážiid mielde masá juohke jagi. Dat mearkkaša ahte eambbosat muitet geavahit šleđggona ja eambbosat vuigejit ahte lea dehálaš oidnot johtolagas. Seammás fertet dovddahit ahte badjel bealli mis guođđá šleđggona ruoktot, ja dat lea hui suddu, lohká Trygg Trafikk gulahallanráđđeaddi Ann-Helen Hansen preassadieđáhusas.
2015 rájes lea šleđggongeavaheapmi lassánan sakka, dalle geavahii dušše 31 proseantta šleđggona.
– Šleđggona haga leat masá oaidnemeahttumat go lea seavdnjat ja biilavuoddjis ii leat masá áigi reageret go vuos fuomáša du. Čakčat ja dálvet vuojahallet eanemus vázzit, ja vaikke biilavuoddjis lea váldoovddasvástádus, de ferte vázzi sihkkarastit ahte oidno johtolagas, lohká Hansen.
Vuolit leahtu
Lea dehálaš ahte biilavuoddji lea erenomáš áicil vai fuomáša vázziid veiggodettiin ja seavdnjadin. Trygg Trafikk ávžžuha vuolidit leahtu.
– Biilavuoddjái lea dehálaš atnit muittus ahte juohke nubbi vázzi ii geavat šleđggona ja ahte eanaš vázzit vuojahallet go rasttildit luotta. Ii okta ge háliidit vuodjit nuppi njeaiga, ja dalle berre vuodjit várrogasat, lohká Hansen.
Ovddeš guorahallamat čájehit ahte olbmuid mielas lea dehálaš geavahit šleđggona, muhto oallugat eai muitte šleđggona coggat dahje váldit fárrui go vulget ruovttus.
– Mii fertet muitigoahtit šleđggona go áigut olggos. Darvet šleđggoniid jáhkaide ja lávkkaide, sáhttá maid nahkehit šleđggona skuova sisa vai dat ii báze go vuolgá johtui.
