EL ja IT searvvit áigot viiddidit bargoheaitaga energiijasektovrras KV Bedrift vuostá mánnodaga rájes.
EL ja IT searvvit áigot viiddidit bargoheaitaga energiijasektovrras KV Bedrift vuostá mánnodaga rájes.
– Mii bidjat buohkaid bargoheaitagii. Mii leat dolkan das go vuostebealli ii oainne čovdosiid mat sáhttet loahpahit bargoheaitaga, dadjá EL ja IT servviid šiehtadallanjođiheaddji Bjørn Fornes.
Buot bargiid váldet bargoheaitagii
Bargoheaitta lea bistán measta njeallje vahkku ja leat ollu ságastallamat leamaš EL ja IT servviid ja KS Bedrift gaskkas, muhto aŋkke eai leat čovdosat oidnosis.
EL ja IT searvvit bidjet buot táriffabargiid bargoheaitagii dál.
Badjel 1000 energiijabargi 73 fitnodagas galget leat mielde bargoheaitagis mánnodatiđida rájes, miehtá riikka.
Sáhttet geavvat elrávnnji haga leat
Bargoheaitta sáhttá dagahit stuora váikkuhusaid. Buot elrávdnjedivodeamit bissehuvvojit.
– Olbmot ja fitnodagat sáhttet massit elrávnnji. Dat lea šállošahtti, muhto mii addit dieđusge lobi divodeapmái, jus lea heaggavárra. Mihttu lea oažžut KS Bedrift šiehtadallat dohkálaš čovdosiid, dadjá Fornes.
Friddjaortnet goazada
Soahpameahttunvuohta vuolgá friddjaortnegis sidjiide geain lea gearggusvuođavákta.
Dábálaš gearggusvuođavákta lea čieža jándora hávális, juohke viđat vahkku miehtá jagi.
– KS áigu min miellahtuin váldit eret logi vuoiŋŋastanbeaivvi jagis, vaikko váktaáigi ii leat geahpiduvvon. Min miellahtut muitalit losibun gártan čađahit vávttaid go leat garrasit dálkkit, stuorát bargoguovllut, unnit bargoveahka ja galgá leat jođánis responsaáigi. Sii leat gergosat searvat bargoheaitagii nu guhká go lea dárbu, dadjá Fornes.
