-Almmuhus-
-Almmuhus-
OĐĐASATMáŋggas váidon maŋŋel doarruma

Máŋggas váidon maŋŋel doarruma

-

-

Romssa ja Finnmárkku politiijain leamaš iešguđetge barggut mannan jándora. Politiijaloggas dieđihuvvojit feastariejat, doarrumat, buollin ja luovosbeanagiksi. 

Sotnabeaiija birrasii diibmu 00.30 ožžo politiijat dieđu doarruma birra Sámmolváris, Gáivuona suohkanis. 

– Máŋggas ledje doarrán ja politiijat šadde sin sirret go bohte báikái. Muhtimat šadde fitnat doaktára luhtte. Politiijat leat čielggadan ášši ja váidet sin geat ledje seahkánan doarrumii, dieđihit Romssa politiijaguovllus. 

Buollin

Lávvardaga buollái muhtin garáša Breannjás, Porsáŋggu gielddas, dieđihit Finnmárkku politiijaguovllus. 

– Heahteetáhtat fitne báikkis. Garášas ja viesus mii lea seamma sajis eai lean olbmot, čállet politiijat Twitteris. 

Luovosbeatnagat

Guokte luovosbeatnaga rohkkáhedje bohccuid Gávkevuona ja Gihcádaga gaskkas, Davvenjárgga gielddas lávvardaga. 

– Guokte husky leamaš luovus dan guovllus ja beatnagat leat rohkkáhan bohccuid. Boazoeaiggát lea váldán beatnagiid gitta, dieđihedje Finnmárkku politiijat Twitteris ikte. 

Feastariejat

Muđui dieđihit sihke Finnmárkku ja Romssa politiijat ahte leamaš olu bargu feasttaid geažil. 

Politiijat leat ožžon dieđuid sihke feastariejaid ja doarrumiid birra Gilevuonas, Bearalvágis, Álttás, Hámmerfeasttas, Sáččás, Romssas ja Hársttáin. 

– Hársttáin ja Áisajogas leat politiijat bissehan guokte biilavuoddji geaid navdit vuodján gárrenoaivvis, dieđihit Romssa politiijaguovllus. 

-Almmuhus-