-Almmuhus-
-Almmuhus-
KULTUVRA Mánát loahpahit cd-trilogiija

Mánát loahpahit cd-trilogiija

-

-

Odne almmuhuvvo ođđa mánáid-cd Ijahis Ijas, ja nu loahpahit sii Ima-trilogiija. Guldal oasáža dáppe:

– Álggos lei jurdda ráhkadit dušše ovtta cd, muhto de šattai miella ráhkadit vel nuppi ja nu dal de viidánii. Dál dovddan ahte lean geargan go lean deavdán trilogiija ja de lea áigi dahkat eará diŋggaid. Lea miella čállit maiddái ollesolbmuid lávlagiid boahtteáiggis, muitala Ima Aikio ieš.

Dát lea goalmmát ja maŋimuš oassi Ima, Inger Mari Aikio mánáid-cd trilogiijas, ja ođđa skearrus leat 13 máná ja nuora artistat. Sii ásset iešguđet guovllus Sámis ja lávlot lávlagiid maid Ima Aikio lea doaimmahan ja čállán.

Miro Miro Mantere lea fas bidjan šuoŋaid, bádden lávlagiid ja buvttadan cd. Son maid čuojaha skearrus ovttas eará ámmátmusihkkariiguin.

 

Maiddái duođalaš fáttát

Cd:s leat 12 lávlaga sámegillii. Sánit muitalit gehppes áššiin nugo čáziin stunžemis ja áhku bánnogáhkuin. Ima ii goittot garvve duođalaš áššiidge ja buktá ovdan máŋgga mánnái oahpes dili, mo lea go váhnemat earránit dahje jus váhnen juhká.

– Mu mielas mánáid eallimii gullá vaikke mii, ii álot dušše geahppaseamos dilli. «Guokte ruovttu» lávlla lea gehppes lávlla mii muitala ahte sáhttá lihkolaš eallin vaikke váhnemat leat earránan,. Nu guhká go váhnemat ráhkisteaba máná de ii leat mihkkege heđiid. «Speajal cuovkana» lea ges jugešvuođa birra, muitala mánáid dovdduid birra muhto das lea čuovgadat loahppa ja boahtteáiggi doaivva. Vaikke olbmos leat juhkkis váhnemat de ii dárkkut ahte eallin ii sáhte buorránit, čilge Aikio.

Ima mánáid-cd trilogiijas lea ovdal almmustuvvan Ima Ipmašat (2007), mas lávlo ja dahke šuoŋaid sámi beakkán artisttat nugo Mari Boine, Niko Valkeapää, Sofia Jannok ja Kai Somby. Dasto Ima hutkosat (2011), loktii oidnosii guokte nuorra čeahpi, Niillas Holmberg ja Hildá Länsman. Soai lávlluiga lávlagiid, maidda leigga ieža dahkan šuoŋaid.

 

Dás beasat gullat oasáža «Oba mihá somá» lávlagis man Mubemihkkal Juntunen lávlu. (Šállošat heajos jietnadási ovddas) :

 

Stuorra beaivi artisttaide

Konsearta álgá diibmu 18 (suoma áigges) Sajosis Anáris, ja Ima lea hoahpuid siste viehkamin duohkut deike go Ávvir hálešta suinna.

– Artisttat leat aiddo čoahkkanišgoahtán deike ja leat hárjehallamin. Mánát illudit ja orrot maid veahá gealdagasas. Jáhkán dát lea stuorra beaivi sihke sidjiide, váhnemiidda, munnje ja sávvamis maiddái gehččiide, loahpaha Ima Aikio.

 

 

- Advertisement -
-Almmuhus-