Girkočoahkkin mearridii dahkat lullisámi giellaguovllu sámi searvegotti, Saemien Åålmege, bistevaš ortnegin.
Girkočoahkkima 116 áirasa čuožžiledje gieđaid doaškut go ovttajienalaš mearrádus lei dahkkon.
– Árvvusátnit sámi girkoeallima ja addit dasa ovdananvejolašvuođaid čájeha ahte mii leat álbmotgirku. Searvegotti ovdaneapmi 2009 rájes čájeha ahte sámi girkoeallin ahtanuššá go árvvusádnojuvvo ja fuolahuvvo, dadjá Norgga Girkoráđi jođiheaddji Svein Arne Lindø preassadieđáhusa bokte.
– Historjálaš lávki
Jagis 2009 ásahuvvui lullisámi searvegoddi geahččalanortnegin. Giđa 2012 árvvoštalai Nidaros bismagodderáđđi geahččalanortnega lullisámi searvegotteráđiin ovttas. Árvvoštallama vuođul čielgasi ávžžuhedje dahkat searvegotti bistevaš ortnegin.
– Mii illudit go mii dál leat ožžon bistevaš ja buriid rámaid doaibmat searvegoddin, dadjá Saemien Åålmege searvegotteráđi jođiheaddji Sigfred Jåma. Son gohčoda Girkočoahkkima mearrádusa historjjálaš lávkin sámi girkoeallimii.
Miellahtut lassánan
2009:s ledje Lullisámi searvegottis 120 mielláhtu, 2011:s 289 mielláhtu ja dál 430 mielláhtu.
Lullisámi searvegoddi lea Nidarosa bismma geahču vuolde, muhto dat gokčá stuorát geografálaš guovllu. Girkolaš fálaldat lullisámiide fállojuvvo sihke lullisámi guovllus ja dan olggobealde, ja dat dahkko lullsámi báhpa ja searvegotti diakona, oskuoahpaheaddji ja beaivválaš jođiheaddji bokte.
Eambbo dieđuid Girkočoahkkima birra gávnnat dás: www.kirken.no/km2015.
Norgga girku Girkočoahkkin lea čoahkis Troandimis cuoŋománu 9.-15. beivviid.
Ihttá báberáviissas sáhtát lohkat eanet dán birra.
