Stáhta geaidnodoaimmahat galgá ráhkadit 2,2 kilomehtera ođđa E6 luotta gaskal Leaibevuona ja Leavnnja.
Ođđa luodda šaddá 8,5 mehtera govdat ja šaldi mii manná Vuolmmašjoga rastá Porsáŋggus galgá gaikkoduvvot ja ođđa šaldi boahtá sadjái.
– Ođđa luodda čatná olles Porsáŋggu oktii ja das lea stuora mearkkašupmi olles Finnmárkui. Dasa lassin šaddá ođđa luottas ja šalddis buoret johtolatsihkarvuohta ja buoret vuodjit, čállá Stáhta geaidnodoaimmahat preassadieđáhusas.
Bargagohtet guovvamánus
Oktiibuot leat logi fitnodaga addán haddeevttohusa dan bargui.
– Dál mii galgat árvvoštallat ja dárkkistit haddeevttohusaid. Sávvamis mii sáhttit kontrávttaid vuolláičállit ođđajagemánus, ja jus buot manná bures, de sáhttá bargu luottain álggahuvvot guovvamánus boahtte jagi, dadjá Stáhta geaidnodoaimmahaga huksenjođiheaddji Juho Sirjola.
