Dán vahku ožžot 52 000 kundára vuosttaš rehkega Loatnakássas. Jus dus ii leat ráđđi máksit, de sáhtát maŋidit máksima gitta 36 geardde, dieđiha Loatnakássa.
Go oaččut rehkega Loatnakássas, de fertet máksit dahje bivdit máksinmaŋideami. Dát guoská vaikko vuorddášit ge oažžut oasi loanas rievdaduvvot stipeandan, čállá Loatnakássa preassadieđáhusas.
Jus iešguđetge sivaid dihte ii leat ráđđi máksit, de sáhtát maŋidit rehkega gitta 36 geardde.
Dan lea vuogas diehtit, danin go kundarat geat eai mávsse rehkegiid eaige oza maŋidit dahje sihkkut reanttuid, sis dađistaga loahpahuvvo iežaset loatna mii sirdojuvvo Stáhta gáibidanguovddážii, dieđiha Loatnakássa.
Maŋideami oktavuođas lea dattetge dehálaš diehtit ahte reanttut ain jotket, ja ahte máksináigodat guhkiduvvo seamma guhkkodahkii go maŋideapmi.
Jus dus lea vuollegis dienas, bargguhisvuohta dahje buozalmasvuohta, de sáhtát maid oažžut sihkkojuvvot reanttuid dahje oažžut mávssuid maŋiduvvot ovtta áigodahkii. (©NTB)
