LO geigii vuossárgga gáibádusaid NHO:i dán jagi bálkášiehtadusas. Ii leat dihtosis maid LO gáibida.
Dán jagi bálkášiehtadus lea gaskašiehtadus. Dat mearkkaša ahte dušše bálkkás šiehtadallojuvvo.
Go gáibádus geigejuvvui, de logai LO-jođiheaddji Peggy Hessen Følsvik ahte sin gáibádusa vuođđu lea lasihit oastinfámu, seammás go deattuhit sihke vuollegis bálkká ja ovttalágan bálkká.
NHO-jođiheaddji Ole Erik Almlid dajai iežas bealis ahte dat sihkkarit šaddá hui gáibideaddjin.
– Lea nu ahte mis leat suorggit mat vásihit iešguđetlágan ovdáneami, main leat iešguđetlágan boahtteáigevejolašvuođat ja dan mii fertet váldit vuhtii, dajai Almlid.
Bealit galget šiehtadallat duorastaga rádjái. Jus bealit eai nagot soahpat, de manná čoavdin soabaheapmái cuoŋománu 14.-15. beaivvi.
