Sámi ofelaččat galledit Leavnnja joatkkaskuvlla skábmamánu 28. beaivvi ja Kárášjoga joatkkaskuvlla skábmamánu 29. beaivvi doallan dihte logaldallama sámi kultuvrra ja servodateallima birra. Ulbmil lea loktet máhtu sápmelaččaid birra ja eastadit čearddalaš vealaheami.
Sámi ofelaččat álggahit skuvlagalledemiid skábmamánus, ja Leavnnja joatkkaskuvla lea vuosttaš bisánanbáiki guovtti sámi ofelažžii, Linn-Maggi Jannok-Jomai ja Per-Henning Mathisenii.
– Mun illudan sakka! Leavdnja lea guhkkin eret mu ruovttuguovllu ja Lulli-Sámi guovllus. Lea hui gelddolaš oaidnit dan báikki, dadjá sámi ofelaš Linn-Maggi Jannok-Joma, gii lea Snåases eret.
Sámit leat leamaš oassin Leavnnjas guhkit áiggi, ja Sámi ofelaččat háliidit gaskkustit earret eará sámi historjjá ja sápmelašvuođa. Mihá-dutkamuša mielde nuorra sápmelaččaid psyhkalaš dearvvašvuođa birra vásihit sápmelaččat vealaheami dávjjibut go majoritehtaálbmot.
– Dat lea deaŧalaš bargu lokten dihtii máhttodási sámi kultuvrra ja servodateallima birra, dadjá sámi ofelaš Per-Henning Mathisen.
