SPR nuoraidkonferánssas besse nuorat geahččaladdat ovdanbuktinhámi maid eai goasse lean geahččalan.
Jon-Arnulf Bonk, Evenáššis eret, lea Troandimis čuovvume Sámi Parlamentáralaš Ráđi nuoraidkonferánssa. Son lea jođiheaddji Sámiid álbmotsearvvi nuoraidorganisašuvnnas.
Son searvvai slam-poehtalaš bargobádjái, mii lei okta bargobájiin masa nuorat besse dieđihit.
— Lea nu váttis go fertet nu olu jurddašit, it sáhte duššo summál oktii bidjat buot, fertet jurddašit, lohká son.
(Ášši joatká gova vuolábealde)
Son ii lean goasse ovdal geahččalan slam-poetriija, ja juste danne áiggui geahččalit dan.
Ođđa suorgi
Slam-poetry lea oalle ođđa poehta suorgi, mii čuožžilii Ameriikkas 80-logus. Das lea ulbmil muitalit oaiviliid poehtalaš hámis, ovdanbuktit dan, olles gorudiin.
Bargobáji jođihii Heta Kerokoski, guhte lea máŋga jagi bargan slam-poehtriijain.
— Lea ovdanbuktinhápmi, leat dávjá iežas historjjat, vásáhusat ja jurdagat mat ovdanbuktojuvvojit. Olbmot čállet iešguđet áššiid birra, sáhtá ráhkisvuođa birra, dahje rigearáris ránnjá birra. Muhto dávjá lea politihkalaš vuođđu, lohká Kerokoski.
(Ášši joatká gova vuolábealde)
Slampoesiijas lea ovdanbuktin stuora oassi, go ii galgga duššo lohkat teavstta, muhto čájehit gorudiin maid. Nuorat galget oasáža čájehit ávvumállásiin eahkes.
— Manná hui bures, sii čállet buriid teavsttaid, muhto lea stuora lávki duostat ovdanbuktit dan, lohká son.
Nuorat besse searvat bargobájiide gos ohppe juridihka, musihka, rap, luođi, grafitti ja slam-poehtria. Ávvumállásiin eahkes galget buohkat ovdanbuktit maid odne leat doaimmahan.
