Čakčamánu 26. beaivvi streikegohtet buot Finnmárkku bussevuoddjit.
Yrkestrafikkforbundet, Fellesforbundet, Jernbaneforbundet ja Fagforbundet gáibidit ahte bargoaddit doahttalit industriijabargiid bálkašiehtadusa.
– Mii leat beahtahallan go bargoaddi ii ipmir duođalašvuođa bussevuddjiid bálkká dáfus. Mii leat ovdalaččas soahpan ahte bálká galgá industriijabargiiddásis, ja dál oaidnit ahte dat ii leat doahttaluvvon. Sii leat rihkkon lohpádusa, dadjá searvvi hoavda Jim Klungnes Yrkestrafikkforbundet preassadieđáhusa bokte.
77 bussevuoddji
Yrkestrafikkforbundet organisere beali Norgga bussevuddjiin, ja leat bidjan 77 bussevuoddji streikii Finnmárkkus.
Yrkestrafikkforbundet searvehoavda Klungnes sávvá ahte bargoaddit rievdadit bálkáfálaldaga mielčuovvuid dihte, ja ahte sii sáhttet streaikka heaittihit jođáneamos lági mielde vai dat ii čuoza olusiidda.
Njeallje searvvi leat ovttasbargame bálkáfálaldagain. Yrkestrafikkforbundet bidjá 2147 bussevuoddji streikii, Fellesfobundet, Jernbaneforbundet ja Fagforbundet fas 2421 bussevuoddji, oktiibuot šaddet 4568 bussevuoddji streikii. Jus eai soabat áššis, de sáhttet 12 000 bussevuoddji šaddat streikii olles Norggas.
