Álttá Siida Kulturviessu šaddá oassin Álttá Sámi Giellaguovddážis. Dan oktavuođas eai oza dušše ođđa nama guovddážii.
Miessemánus mearriduvvui goappaš generálačoahkkimis ahte kulturviessu galgá šaddan oassin giellaguovddážis. Dan guovtti oasussearvvi eaiggáduššá Álttá Sámi Searvi. Giellaguovddáža eaiggáduššá maiddái Álttá suohkan unnitlogueaiggádin. Dál, go dat biddjojit oktii, eaiggáduššá suohkan maid oasi Álttá Siida Kulturviesus.
Sihke nama ja viesu ozus
– Dan oktavuođas dárbbašit ođđa, vuogas nama Álttá ođđa sámi giella- ja kulturguovddážii. Mii bovdet du sáddet nammaevttohusa oktan ákkastallamiin manin juste diet namma heivešii, čállá Álttá Sámi giellaguovddáža beaivválaš jođiheaddji Marit Kirsten Eira preassadieđáhusas.
Eira čállá ahte son geas lea vuoitoevttohus, vuoitá 4000 ruvdnosaš Amfi skeaŋkakoartta. Jus leat máŋga ovttalágan vuoitoevttohusa, de juhkko skeaŋkakoarta. Áigemearri sáddet nammaárvalusa lea borgemánu 20. beaivvi.
– Mii ohcat seammás heivvolaš vistti ođđa giella- ja kulturguovddážii. Dárbbašit unnimusat 80 kvm, golbma kantuvrra, ovtta klássalanja ja olgobirrasa man sáhttit geavahit kulturdoaimmaide, čállet sii ja bivdet cavgilemiid.
