Beaivváš lea gearggus vuostái váldit Norgga kulturministara go finada Guovdageainnus ja earret eará Sámi Našunálateáhteris njukčamánu 6. beaivvi.
Sámi Našunálateáhter lea ilus, ja veaháš rámis maid, go kulturministtar, Trine Skei Grande, boahtá sin guossái, čállá Beaivváš Sámi Našunálateáhter preassadieđáhusas.
Dehálaš
Sámi Našunálateáhtera mielas lea maid hui dehálaš ahte Norgga kulturministtar ja su ráđđeaddit leat bidjan áiggi fitnat gullame teáhtera doaimmaid ja árgabeaivvi birra, ja ahte beassat sidjiide čájehit Sámi Našunálateáhtera viessodili.
Kulturministtar Trine Skei Grande galgá maid earret eará finadit Kárášjogas gos áigu galledit Sámedikki.
