Romssas registrerejedje bearjadaga guokte ođđa koronanjoammuma, ja dat mearkkaša ahte koronavirus lea moatti beaivvis njommon guđa olbmui.
Romssa suohkan dieđiha preassadieđáhusa bokte bearjadaga ahte koronavirus lea duođaštuvvon vel guovtti olbmos. Guktuin lea lagas oktavuohta koronabuhcciide.
Koronavirus duođaštuvvui Romssas duorastaga, ja dan maŋŋel lea dat njommon guđa olbmui.
– Dássážii orrot nákcen kártet buot lagas oktavuođaid, muhto mii bargat ain njoammunguorramiin. Čuovvovaš jándoriid šaddá hui dehálaš oažžut oppalašgeahčestaga njoammundilis, lohká Romssa koronaguovddáža fágajođiheaddji Øivind Benjaminsen preassadieđáhusas.
Koronavirus fuomášuvvui Romssas maŋŋel go muhtin mátta-norgalaš lei galledan gávpoga mannan vahkkoloahpa.
