Norgalaččat eai oaččo koronaboahku ovdal go áramusat beannot jagi geahčen. Sáhttá maid ádjánit máŋga jagi.
Álbmotdearvvašvuođainstituhtta (FHI) dat buktá dán dieđu ođđaseamos raporttas.
– Ferte vuos doarvái boahkuid buvttadit, ja jus manná bures, sáhttá áramusat 2021 čavčča addit dán boahku norgalaččaide. Jus ii mana nu bures, ii soaitte boahkku gávdnamis máŋgga jahkái, čállet raporttas. Dan muitala Aftenposten.
Álbmotdearvvašvuođainistuhta direktevra Camilla Stoltenberg lohká aviisii ahte ii gávdno eará vuohki beassat koronaepidemiijas go addit boahku dan vuostá dahje vuordit álbmoga šaddat immunan.
– Historjjás gávdnojit ovdamearkkat virusiidda mat leat ieža jávkan, muhto dan ii sáhte vuordit dál go virus lea leavvan miehtá máilmmi, dadjá Stoltenberg. (©NTB)
