NM-silbba vuoiti, King Klæbo, lea njunnošis Norgga cupa heargevuodjimis.
Nubbi oassi heargegilvocupas lágiduvvui mannan vahkkoloahpa, ja Team Nils Jøran heargi King Klæbo vuittii gilvvu ja lea dál čoaggán eanemus čuoggáid ja lea njunnošis Norgga cupa ráidogilvvus.
– Mun lean duhtavaš dainna maid King Klæbo lea čájehan dán rádjái, ja jáhkán das galgá leat vejolašvuohta vuoitit sihke ráidocupa ja Gollehearge-gilvvu, lohká Team Nils Jøran gulahallanolmmoš, ja son gii lea addán Johannes Klæboi King Klæbo nammasaš hearggi, Mikkel Andreas Eira.
Vuittii mottiin sekunddain
Dán háve lei áigevuodjin.
Dat doaibmá nu ahte hearggit ruhttet 1000 mehtera šilju birra okta ja okta, ja áigi váldo.
Nu dahket guovtte geardde, ja de bidjet oktii áiggii. Geas lea buoremus áigi, dat vuoitá.
King Klæbo lei njunnošis vuosttaš vuodjimis juo, go lei beannot sekundda buoret áigi go Tokos, mas lei nubbin buoremus áigi vuosttaš ruohttamis.
Nuppi ruohttamis King Klæbo buoridii vel áiggii measta sekunddabeliin, ja dainna faskii vuosttaš saji.
Oktiibuot lei 2,5 sekundda buoret áigi go Per Ole Vars hearggis, Lihkus, mii nubbin bođii gilvvus.
Govven: Nils Johan Vars
Gilvu nuppi saji alde
Norgga cupa 2. oassegilvvu nuppi saji alde šattai maid hui gilvu.
Per Ole Vars vuoján, Lihkku, bođii nubbin.
Anne Risten G. Sara nieiddaža, Aile Sofie G. Sara, vuoján, Toko, bođii goalmmát sadjái.
Go bidje áiggiid oktii maŋŋel guovtti ruohttama, de lei erohus dan guovttis dušše 0,01 sekundda.
Per Ole Vars vuojánis, Lihkus, lei vuosttaš ruohttamis goalmmádin buoremus áigi, muhto lei liikká 0,81 sekundda heajut áigi go Tokos.
Nuppi ruohttamis lei Lihkus 0,82 sekundda buoret áigi go Tokos, ja de maid dakko bokte válddii nuppi saji.
| Sadjii: | Vuoján | 1. áigi | 2. áigi: | Loahppaáigi: |
| 1 | King Klæbo | 1.19.15 | 1.18.82 | 2.37.97 |
| 2 | Lihkku | 1.21.50 | 1.19.02 | 2.40.52 |
| 3 | Toko | 1.20.69 | 1.19.84 | 2.40.53 |
| 4 | Oreo | 1.21.72 | 1.19.29 | 2.41.01 |
| 5 | Selfie | 1.20.76 | 1.21.33 | 2.42.09 |
| 6 | Amhan | 1.22.34 | 1.19.77 | 2.42.11 |
| 7 | Lime | 1.21.82 | 1.20.58 | 2.42.40 |
| 8 | Tesla | 1.21.55 | 1.21.19 | 2.42.74 |
| 9 | Trommis | 1.21.63 | 1.21.16 | 2.42,79 |
| 10 | D.Costa | 1.22.26 | 1.20.61 | 2.42.87 |
Eai lihkostuvvan
Vuosttaš Norgescup oassegilvvu vuoiti, Ana Maria Eira vuoján, beakkán Suiva, ii lihkostuvvan beare bures.
Gilvvus válddii 13. sajii, 6, 62 sekundda King Klæbo maŋábealde ja dakko bokte maid ravggai eret njunuš sajis Norgga cupa ráidogilvvus, ja lea dál viđat sajis.
Norggameasttir, Selfie, fas ruohtai viđat sadjái, 4,12 sekundda heajut áigi go vuoitis.
Njunnošat
Mannan vahkkoloahpa bohtosat mielddisbuktet ahte King Klæbo lea njunnošis, 33 čuoggáin.
Nubbin Nils Jøran Eira vuoján, Oreo, 32 čuoggáin.
Goalmmádin Nils Jøran Eira vuoján, Lime, 26 čuoggáin.
| Sadjii | Vuoján: | Eaiggát | 1. gilvu | 2. gilvu | Oktibuot čuoggát: |
| 1 | King Klæbo | Johannes Klæbo | 15 | 18 | 33 |
| 2 | Oreo | Nils Jøran Eira | 17 | 15 | 32 |
| 3 | Lime | Nils Jøran Eira | 14 | 12 | 26 |
| 4 | Selfie | Biret Julianne Hætta | 11 | 14 | 25 |
| 5 | Suiva | Ana Maria Eira | 18 | 6 | 24 |
| 6 | Karibo | Mihkkal Ante Hætta | 16 | 7 | 23 |
| 7 | Amhan | Klemet Amund Eira | 9 | 13 | 22 |
| 8 | Tesla | Mikkel Jonas Eira | 7 | 11 | 18 |
| 9 | Lihkku | Per Ole vars | – | 17 | 17 |
* Gilvui leat searvan oktiibuot 25 hearggi. Dat ovcci hearggi mat eanemus čuoggáid čogget Norgga cupa gilvvus besset Golleheargegilvui. Guovtti gilvvu maŋŋel leat dál dá dat ovcci hearggi mat leat njunnošis.
