Norgga ráđđehus lea evttohan lasihit divada el-biillaide deattu vuođul, maid NAF ballá sáhtta bilidit el-biilaberoštumi boaittobealbáikkiin.
Divat mii lea evttohuvvon lasihuvvot lea dan ektui man lossadat el-biillat leat. Stuora oassi el-biiladeattus lea das man stuora báhtter das lea. Stuora báhtteriin joavdá guhkkelii go lea deavdán báhttera, muhto mađi stuorit dat lea, dađi losit šaddá dakkár biila. Dan oaivvilda NAF senior gulahallanráđđeaddi, Nils Sødal, ahte dat sáhttá bilidit el-biilaberoštumi boaittobealbáikkiid olbmuin.
Norstat lea čađahan iskkadeami NAF ovddas das ahte árvvoštallet go boaittobeale báikkiid olbmot el-biilla oastit vai eai. Doppe boahtá ovdan ahte 2021:s ledje 33 proseantta mielas el-biilla oastit alcceseaset boahtte biilan. Seamma iskkadeapmi čájeha de ahte dál olles 40 proseantta oasttáše el-biilla boahtte biilan.
NAF čilge ahte boaittobealbáikkiid olbmuin lea stuorimus ágga manin eai oastte el-biilla leamašan dán rádjai dat ahte dainna ii goastta nu guhkás ovdal go deavdit šaddá bahttera, ja ahte gávdnojit go bahtterdeavdinbáikkit das lahkosis. Sii jáhkket boaittobealbáikkiid olbmot vuoruhivčče el-biilla mas lea stuora bahtter, mii de dađibahábut mielddisbuktá dan ahte sáhttet divrut.
Sosialisttalaš gurutbellodat lea dat mii lea dorjon dálá unnitlogu ráđđehusa posišuvdnii, ja sii leat mannan vuostá dan ahte lasihit divada deattu vuođul. Dasa galget dál Bargiidbellodat, Guovddašbellodat ja Sosialisttalaš gurutbellodat šiehtadit stádabušeahttaevttohusa, ja juste lea ge dat el-biiladivat sin beavddi alde mii lea okta čuoggáin maid galget šiehtadit ja soahpat movt dahket.
Iskkadeamis leat boaittobealbáikkiid olbmot sii guđet orrot nu go Ákŋoluovttas, Ivgus, Ravrreviikas, ja daid sullasaš sturrodat báikkiin.
