Romssa suohkan lea mearridan doarjut RomsaDál prošeavtta 30 000 ruvnnuin vai eastadanbargu sáhttá joatkit borgemánu lohppii.
Ođđajagis álggahuvvui RomsaDál prošeakta man ulbmilin lea čalmmustahttit sámegiela ja sámevuođa Romssa gávpogis vai eastadivččii sámevaši.
Prošeaktaáigodat lei njeallje mánu, muhto dát lea guhkiduvvon borgemánu lohppii go prošeaktaeaiggát, Romssa valáštallansearvi, oaidná ain dárbbu joatkit bargguin.
– Mii oaidnit vejolašvuođaid ovddidit doaimma ja ásahit RomsaDál bistevaš doaibman, čállá Romssa valáštallansearvi ohcamušas.
Juolludit 30 000 ruvnnu
Romssa ovdagoddi meannudii RomsaDál ohcamuša geassemánu 7. beaivvi. Eanetlohkku mearridii doarjut prošeavtta ruđalaččat, dušše Ovddádusbellodaga ovddasteaddji jienastii vuostá.
Romssa suohkan juolluda oktiibuot 30 000 ruvnnu RomsaDál prošektii.
Dássážii lea RomsaDál maiddái ožžon ruhtadoarjaga Troms Kraftas mii lea juolludan oktiibuot 56 250 ruvnnu prošektii.
RomsaDál lea maid ohcan 96 250 ruvnnu Sámedikkis ja 56 250 ruvnnu Romssa ja Finnmárkku fylkkasuohkanis. Ruđat geavahuvvojit prošeaktajođiheaddji bálkái ja bargobájiide.
