Dál sáhttá ohcat doarjaga Finnmárkku fylkkagielddas ráfáidahtton huksehusaid, kulturmuittuid ja kulturbirrasiid divodemiide.
Finnmárkku fylkkagielda juolluda divodandoarjaga ráfáidahtton visttiid, rusttegiid dahje kulturbirrasiid priváhta eaiggádiidda. Priváhta eaiggát sáhttá leat olmmoš, vuođđudus ja searvi.
Doarjja sáhttá maiddái juolluduvvot earenoamáš gáhttenárvosaš kulturmuittuide riddoguovlluin.
Doarjja vuoruhuvvo čuovvovaččat:
- Doaibmabijut mat hehttejit eanet billisteami.
- Doaibmabijut mat sihkkarastet hárvenaš huksehusaid ja rusttegiid.
- Gaskaboddosaččat sihkkarastit ráfáidahtton huksehusaid vai eai billašuva vel eanet ovdal go divodanplánat gárvvistuvvojit.
- Doaibmabijut riddoguovlluin mat váikkuhit geasuheaddji báikegottiide.
- Ohcamušat main leat iežasoassi vuoruhuvvojit.
Dábálaš divodandássi ovdal 2020
Mihttomearri lea divodit priváhta suodjaluvvon ja eará mávssolaš kulturmuittuid ja kulturbirrasiid vai dat jokset dábálaš bajásdoallanstandárdda ovdal 2020.
Doarjja galgá geavahuvvot antikváralaš vuogi lassegoluide, ja eaiggát sáhttá oažžut dáid goluid ollásit dahje muhtun oasi.
Juolludeami oktavuođas deattuhat ahte geavahuvvojit árbevirolaš ávdnasat, teknihkat, giehtaduodji ja ahte máhtolašvuođahuksen čađahuvvo.
Finnmárkku fylkkagielda vuoruha ohcamiid ja sádde daid Riikkaantikvárii. Riikaantikvára juohká doarjagiid stáhtabušeahtas fylkkaide.
Ohcanáigemearri lea skábmamánu 15. beaivi ja vástádusat sáddejuvvojit njukčamánus 2018. Finnmárkku fylkkagielda celket ahte sii ávžžuhit ohcat doarjaga.
