-Almmuhus-
-Almmuhus-
OĐĐASATJuolluda 220 000 kruvnna Bååstede čájá­hussii

Juolluda 220 000 kruvnna Bååstede čájá­hussii

-

-

Nordlándda fylkkaráđđi juolluda 220 000 kruvnna čájehit sámi dávviriid Árranis Divttasvuonas. Lea Julev-sámi vuorká-dávvirat mat dál leat universitehta etnográfalaš museas Oslos ja mat galget máhcahuvvot Bååstede prošeavtta oktavuođas.

Universitehta etnográfalaš museas leat birrasii 4200 vuorká-dávvira čohkkejuvvon miehtá Sámi. Dán čoakkáldagas lea 383 Julevsámi vuorká-dávvira mat galget máhcahuvvot ruovttoluotta Bååstede prošeavtta oktavuođas, čájehuvvot čájáhusas Árranis guovvamánu 2022:s, čállá Nordlándda fylkkagieldda preassadieđáhusas. 

Bååstede prošeakta vuolgá das ahte lea Norgga geatnegasvuohta sámi eamiálbmogii ja dán prošeavtta olis oažžu fas sámi álbmot ráđđenvuoigatvuođa iežaset kultuvrii. 

– Sámediggi álggahii dán sámi kulturárbbi máhcahanbarggu prošeavtta. Das ii leat dušše stuorra kulturhistorjjálaš mearkkašupmi sámi álbmogii, muhto maiddái olbmuide geat ásset dain guovlluin gosa dat vuorká-dávvirat gullet, lohká Nordlándda fylkkagieldda kultuvrra, dálkkádaga ja birrasa fylkkaráđđi Kirsti Saxi ja sávvá dát šattašii ávkin buohkaide ja nannešii julevsámegiela. 

-Almmuhus-