Ikte leat Sámediggi, Hápmir suohkan ja Nordlándda fylkasuohkan ásahan Árran julevsáme guovdásj AS.
Árran julevsáme guovdásj AS oasuskapitála lea 2 miljovnna ruvnno, ja lea 2000 oasus mas árvu lea 1000 ruvnno juohke ossosis. Oasuseaiggádat leat Sámediggi, Hápmir suohkan ja Nordlándda fylkasuohkan. Árran lea erenomáš dehálaš sámi institušuvdna sihkkarastit, ovdánahttit ja joatkit julevsámi kultuvrra, giela ja servodateallima, čállá Sámediggi preassadieđáhusastis.
– Lean ilus go Árrana boahtteáigi lea sihkkaraston, das lea guovddáš rolla ealáskahttit báikkálašservodaga ja ásahit bargosajiid, gaskkustit ja juohkkit gelbbolašvuođas ja ovdánahttit giela seammás go hálddaša sámi kulturárbbi, dadjá sámediggeráđđi Maja Kristine Jåma.
Árran stivra:
Stivrajođiheaddji: • Amund Eriksen (Sámediggi)
Muđui leat dát stivrralahtut: • Anne Britt Klemetsen Hætta (Sámediggi) • Sten Hilling (Hápmir suohkan) • Linda Jessen (Hápmir suohkan) • Rolf Steffensen (Nordlándda fylkasuohkan)
Sámedikki eaiggátoassi lea 49 proseantta, mii mearkkaša sis leat 980 ossosa. Hápmir suohkana eaiggátoassi lea 34 proseantta, mii lea 680 ossosa. Nordlándda fylkasuohkan eaiggáduššá fas 17 proseantta ja sis leat 340 ossosa Árran julevsáme guovdásj AS. Gáldu: Sámediggi
