Plan International ođđa raporttas boahtá ovdan ahte juohke goalmmát nieida ii searvva politihkkii, ja juohke viđat nieida ballá veahkaválddálašvuođas ja áitagiin jus searvá politihkkii.
– Lea suorggahahtti go nieiddat ja nuorra nissonolbmot miehtá máilmmi eai searvva politihkkii. Váikkuhus lea ahte nieiddaid ja nissonolbmuid jietna ii gullo, eaige beasa mielde váikkuhit iežaset eallima. Go sii eai searvva, de beassá son guhte mearrida, mearridit ja nanne dasto iežas oainnu. Dásseárvu álgá go nieiddat ja nissonolbmot vulget áirrasdoaimmaide, muitala Plan International Norge generálačálli Kari Helene Partapuoli.
Dán jagáš raporta čájeha ahte nieiddain leat olu cakkit oassálastit politihkalaš doaimmaide. Raporta čájeha ahte okta juohke goalmmát nieiddas vásiha ahte ii sáhte beroštit ja oassálastit politihkas. Ja juohke viđat nieida ges váruhuvvo áŋgiruššamis, go árbevirolaččat nieiddat eai galgga nu olu oaivvildit.
Vásiha vuostehágu
Swastika (19), Nepalas eret, lea áŋgiruššan politihkalaččat dan rájes go lei 13 jagi boaris. Son dattetge vásiha vuostehágu ja bilkideami dan dihte go lea nieida. Vaikke vel vásiha ge caggama, de son ii vuollán.
– Olbmot oaivvildit ahte nieiddat eai galgga áŋgiruššat politihkalaččat. Olu nieiddat ballet das ahte olbmot bidjet gažaldaga dasa manne son áŋgiruššá. Dat čuohcá nieiddaide ja nieiddaid sajiide servodagas, go sin áŋgiruššan čuohcá sin bearraša beaggimii, čilge Swastika NTB:i.
Almmuhuvvo nieiddaid beaivvi oktavuođas
Raporta almmuhuvvo internationála nieiddaid beaivvi mii lea golggotmánu 11. beaivvi. Dán jagáš raporta lea Plan Internationala 15. raporta, mii čájeha nieiddaid dili miehtá máilmmi.
– Mii oaidnit ovdamearkkaid gos nieiddat geat leat áŋgiruššan leat goddon, dahje vásihit juoidá man mii eat sáhte dohkkehit. Dan dihte ferte máilmmi servodat láhčit dili nu ahte nieiddat oadjebassat besset oaivvildit ja áŋrigruššat iešguđetge doaimmaide. Dáinna lágiin leat mii mielde cuvkemin stereotypiijaid ja guottuid mat gusket dasa go nieiddat ja nissonolbmot áŋriruššet politihkas. Seammás fertet mii dohkkehit ahte lea fápmojuohkimis sáhka, ja dan dihte mii čuožžut fárrolaga nissonolbmuiguin dán giččus, čilge Partapuoli.
