Fylkkaráđđi juohká miljovnnaid, earret eará Innovašuvdna Norgii ja suohkaniid ealáhusfoanddaide.
Oarjemáilbmi lea garrasit ráŋggáštan Ruošša go leat soađáskan Ukrainain, ja dat čuohcá Nuorta-Finnmárkku ealáhusaide. Stuoradiggi lea háliidan doarjut ealáhusaid ja juolludit 50 miljovnna ruvnno lassidoarjaga man fylkkasuohkan galgá juohkit. Mihttu livččii nannet nuppástuhttima ja ovdáneami Nuorta- Finnmárkku ealáhusaide.
– Muhtin fitnodagaid doaibma lea vuođđuduvvon ránnjáriikka ovttasbargguin ja gávppašemiin. Dain ealáhusain lea nuppástuhttin dehálaš dás ovddasguvlui, dadjaba Romssa ja Finnmárkku fylkka fylkkaráđit Karin Eriksen ja Ronald Wærnes (goappašagat Guovddášbellodagas) preassadieđáhusas.
Váikkuhusat
Fylkkaráđđi lea juohkán ruđaid. Sii leat addán doarjaga Innovašuvdna Norga Arktisii (16 milj.), suohkanlaš ealáhusfoanddaide (15 milj.), Ealáhusgárdimiidda/Inkubahtoriiidda (7 milj.), doarjaga fitnodagaid siskkaldas oahpahussii (BIO-ruđat 3,9 milj.), ođđa doarjaalmmuheapmái gelbbolašvuođas ja rekrutteremis (3 milj.).
Fylkkaráđđi lea válljen nannet guokte prošeavtta mat leat juo doaimmas. Dat leat «Varanger=Utvikling» ja «Kompetansepilot». Dasa lassin leat bidjan logi miljovnna álggahit barggu hábmet guovlluovdáneami šiehtadusa Nuorta-Finnmárkui. Báhcavuonas ja Mátta-Várjjagis lohkaba stuorámus váikkuhusaid ja danne leat ožžon eanemus.
Ovttasbargat
– Mis lea nanu jáhkku ahte ekonomalaš doarjagat leat dehálaš veahkkin, muhto buot dehálepmosat leat olbmot ja dat bargu maid guhtege bargá. Mii oaidnit hirbmat áŋgirvuođa oallugiin, ja lea dehálaš ahte mii doarjut nubbi nuppi vai šaddat vel čeahpibun, dadjá fylkkaráđđi Eriksen.
– Fylkkasuohkaniin lea ovddasvástádus ovddidit servvodaga guovllu dásis, ja mii háliidit nannet dan dehálaš barggu, dadjá Wærnes preassadieđáhusas.
