Fylkkaráđđi addá doarjaga valáštallamii sihkkarastindihte stuorát valljivuođa ja fátmmastandihte buohkaid.
Fylkkaráđđi juohká ruđa Romssa ja Finnmárkku valáštallanbiirii, Barents Sportskomité Norga, Sámi Valáštallan Lihttui ja Fylkkastohkosiidda doaimmashehttejuvvon olbmuide Beardu suohkanis.
Doarjagat valáštallamiidda galget earret eará láhčit dili stuorát valljivuhtii valáštallamis, ovttasbargui našuvnnaid gaska ja fuolahit sámi árbevieruid ja fátmmastit buohkaid.
– Valáštallandoarjagiid vuostáiváldit ovddastit viiddis fálaldaga min fylkkas ja mun illudan oaidnit valljivuođa aktivitehtain masa dat ruhta galgá mannat, dadjá ekonomiija ja kultuvrra fylkkaráđđi, Ronald Wærnes (Gb) preassadieđáhusas.
Searvadahttindoaibma valáštallamii
Romssa ja Finnmárkku valáštallanbiire oažžu badjelaš 6 miljovnna ruvnno jođihandoaibman sihkarastindihte buriid rámmaeavttuid valáštallamii olles regiovnnas.
Valáštallanbiire bargá earret eará searvadahttindoaimmain man mihttu lea ahte valljivuohta valáštallamis galgá lassánit ja unnidit ekonomalaš cakkiid searvamis.
– Romssa ja Finnmárkku valáštallanbiire bargá dehálaš barggu fylkka valáštallamii. Fokuseret searvadahttimii lea hui dehálaš ovddosguvlui, dadjá Wærnes.
Valljivuohta valáštallamis
Barents Sportskomité Norga lea ovttasbargoprošeakta Barentsregiovnnas mas ovttasbargoriikkat leat Norga, Ruoŧŧa ja Suopma. Barents Sportskomité lágida Barents Games 2023 Bådådjos ja dohko leat vurdojuvvon 766 oasseváldi dan golmma riikkas.
Sámi Valáštallan Lihttu bisuha ja ovdánahttá sámi valáštallanaktivitehtaid gos váldoulbmiljoavku leat mánát ja nuorat gaskal 6- ja 19-jagi. Fylkkastohkosat doaimmahehttejuvvon olbmuide lágiduvvojit Beardu suohkanis borgemánu 25.–27. beivviid dán jagi.
