Sámi buohccidivššároahpahusa mielde čuvvot sierra nationála njuolggadusat sámegillii
.– Lea dehálaš ahte leat dearvvašvuođabargit geain lea sámi kulturáddejupmi ja geat sáhttet gulahallat olbmuiguin iešguđet sámi gielaid bokte. Dan galget ođđa oahpahusa njuolggadusat deattuhit, čilge dutkan- ja alitoahppoministtar Henrik Asheim.
Lea Sámediggi mii lea dáhtton sierra nationála njuolggadusaid sámi dearvvašvuođadivššároahpahussii, čállá regjeringen.no.
Dan sávvama doarju Máhttodepartemeanta. Departemeanta háliida ahte sihke Nuortte universitehta, UiT Norgga árktalaš universitehta ja Sámi allaskuvlla leat mielde álggu rájes.
Njuolggadusat jorgaluvvojit vuos davvisámegillii go lea UiT ja Sámi allaskuvla gos oahpahus álggahuvvo.
– Buohccidivššároahpahus Guovdageainnus lea dehálaš doaresbeal oahpahusfálaldat. Dan bokte oččošedje maid gielddaid dearvvašvuođabálvalusat doarvái buohccidivššáriid. Sierra heivehuvvon njuolggadusaid bokte galgá oahppu addit gelbbolašvuođa mii áimmahušašii sámi buhcciid dárbbu. Diehttelasat čuvvot maid njuolggadusat daid seamma gelbbolašvuođa gáibádusaid nu go eará buohccidivššároahpus, čilge Asheim.
Asheim lohká nationála njuolggadusat sámi buohccidivššároahpahusa ovdáneapmái galget dahkkot ovttasráđiid RETHOS:in (mat leat nationála njuolggadusat mat gusket dearvvašvuođa- ja sosiálafágaoahpahussii), mas dat njeallje departemeantta, UiT, Nuortte universitehta ja Sámi allaskuvla leat mielde.
