-Almmuhus-
-Almmuhus-
OĐĐASAT It dárbbaš šat geavahit njálbme­suoji Romssas

It dárbbaš šat geavahit njálbme­suoji Romssas

-

-

Romssa suohkan heaittiha njálbmesuodjeávžžuhusa rámbuvrrain, kollektiivajohtolagas ja taxiin.

Dan dihte go Romssas leat unnon njoammumat, de suohkan heaittiha báikkálaš ávžžuhusa njálbmesuoji geavahit rámbuvrrain, kollektiivajohtolagas ja taxiin.

Bearjadaga, suoidnemánu 16. beaivvi, leat vihtta ođđa koronanjoammuma duođaštuvvon. Dat čájeha ahte lea ain njoammun servvodagas, muhto dáin lea oahpes njoammunbálgá.

– Danne lea ain dehálaš čuovvut oppalaš njoammunsuddjenávžžuhusaid ja njuolggadusaid. Doalat mehtera gaskka nubbái, basa dahje spriite gieđaid ja garvve sosialiseremis jus it dovdda iežat dearvvašin. Dasto doaivumis nagodat garvit stuorát leavvama dál luomus, dadjá gielddadoavttir, Kathrine Kristoffersen preassadieđáhusas.

Ii leat deltavirusvariánta

Romssa suohkan maid bivdá ovttaskas olbmo válddihit iskosa jus doaivu ieš leamaš suojeheapme njoammumii, ja jus leat dávdamearkkat. Jus leat dávdamearkkat ferte bissut ruovttus ja vuordit iskkusbohtosiid.

– Dát guoská maid sidjiide geat leat boahkuhuvvon. Vaikke leat boahkuhuvvon, de sáhtát ain leavvudit njoammuma, vaikke lea unnit liiba das, dadjá Kristoffersen preassadieđáhusas ja lasiha:

– Romssas ii leat vuos duođaštuvvon deltavirusvariánta, vaikke Norggas dat leavvá. Ulbmil lea boahkuhit nu oallugiid go vejolaš boahttevaš vahkkuid. Dat sáhttá eastadit stuorát leavvamii ja lea midjiide veahkkin jus deltavirusvariánta leavvá min lusa.

Iskkusávžžuhus maid gomihuvvo

Romssas lei báikkálaš ávžžuhus válddihit iskosa vihtta beaivvi maŋŋel go bođii Romssas eará báikkiin Norggas, gos lei eambbo njoammun. Dát ávžžuhus maid heaittihuvvo.

Romssa suohkanis leat bearjadaga 27 duođaštuvvon njoammuma, ja 66 olbmo erremis.

-Almmuhus-