Stuorra osiin riikkas bohtet temperatuvrrat njiedjat mannan vahkkoloahpa báhkkasiid maŋŋel. – Šaddá hirbmat gilvu liegga ja galbma áimmu gaskkas, einnostit meteorologat.
Máŋga ovddeš lieggaoláhusa leat časkkojuvvon maŋimuš beivviid.
Eanaš riikkas leat vásihan temperatuvrraid mat ledje badjel 30 lieggaceahki mannan vahkkoloahpa.
Geassemánu 20. beaivvi 1970:s ledje 35,6 lieggaceahki mihttiduvvon Nesbyenis Buskerudas – lieggaseamos temperatuvra goassige mihttiduvvon Norggas.
Lávvardaga geavai fas, go dat 49 jagi boares oláhus časkui Laksforsas Nordlánddas.
Seahkalas dovddut
– Leat veaháš seahkalas dovddut dáid olahusaiguin. Ovtta bealis lea hui miellagiddevaš olu dálkkiin ja ahte olbmuin lea beroštupmi dálkái, nugo leamaš maŋimuš áiggi. Muhto lea maid heajos bealli go jurddaša ahte eana dađistaga lieggana ja šaddet alibut temperatuvrrat, dadjá Meteorogalaš Instituhta stáhtameteorologa Pernille Borander.
Son čujuha su eurohpalaš mielbargiide geat leat beaivválaččat dieđihan báhkkaolahusaid mat leamaš mannan vahkku Eurohpas.
– Orro leame ahte diekkár báhkkabáruid deaivat dávjjibut boahtteáiggis. Go dávjjit olahuvvojit báhkkaolahusat, de lea mearka ahte dálkkádat lea rievdame, dadjá Borander.
Gilvu liegga ja galbma áimmu gaskka
Vuossárgga čuovganeapmái lei registrerejuvvon trohpaidja 35 sajin Norggas.
Dán vahkku bohtet temperatuvrrat njiedjat oalát máŋggain sajin.
– Dál lea Ruošša bajábealde vuollegisdeatta mii buktá olu áimmu polára guovlluin. Davvebiegga buktá dán ges midjiide, ja danne šaddet stuorra erohusat temperatuvrra ektui boahttevaš beivviid, erenoamážit Lulli- ja Gaska-Norggas, čilge Borander.
Oaivegávpogis njiedjá temperatuvra 30 ceahkis 14 ceahkái maŋŋebárgga.
Galbmon Davvi-Norgalaččat
Dan botta go olles Norggas leamaš lieggasat, de lei goalšasit davimus fylkkain.
Sihke Romssas ja Finnmárkkus orrot galbmasat bissumin.
Girkonjárggas leamaš gaskamearálaš temperatuvra 12,1 lieggaceahki dán mánu.
Romssas boahtá temperatuvra leat gaskkál 12 ja 15 lieggaceahki boahttevaš beivviid.
Maŋŋel go temperatuvrrat leat njiedjan dássedit miehtá riikka, de bohtet fas goargŋut loahpageahčen dán vahkku.
– Báhkat bohtet fas ruovttoluotta Lulli-Norgii, Troandimii ja Nordlándii. Muhto eai boađe Romsii ja Finnmárkui, gos vurdo čoaska vahkku, dadjá Borander.
©NTB
