Iskanlisttu dutnje gii leat olgoriikii

Luomustallanáiggi vulget oallugat olgoriikii, muhtimiidda soaitá dát vuosttaš mátki olgoriikii. Gánnáha ráhkkanit bures ovdal mátkki ja sáhttá leat bahá vajálduhttit muhtin áššiid. Dat rávvagat soitet leat badjelmearálaččat, muhto goitge soitet muhtin áššit maid it lean jurddašan. Daid rávvagiid lea Ávvir čoaggán neahtas.

Muitolisttu

Jus leat dakkár gii vajálduhttát jođánit, čális dán listtu báhpár ala ovdal mátkki ja geahčes listtu moddii ovdal go dollet lupmui.

Bileahtat:

– Diŋgo bileahtaid buori áiggis. Jus árrat diŋgot, de sáhtát oažžut buori fálaldaga buori haddái.
 

– Váldde kopiija bileahtas dahje čális olggos mátkedokumeantta maid ožžot e-boasttas.

– Iskka ferte go girdibileahta duođaštit ovdal ruovttumátkki.

– Dárkkis leat go girdináiggit rievdan dan rájes go diŋgojit mátki.

Idjadeapmi:

– Diŋgo hoteallalanja buori áiggis. Jus leat diŋgon páhkkareaissu, de lea dábálaččat girdibileahtat ja hoteallalatnja seamma diŋgojumis.

Pássa, visum ja identifikašuvdna:

– Pássa lea dat áidna persovdnaduođaštus mii lea gustojeaddji olgoriikkas. Muhtin riikkain sáhtát maid birget nášunal identifikašuvdna goarttain, Davviriikkain ja Schengenriikain (Belgia, Fránskka, Greikka, Itáliija, Luxemburg, Nederlánda, Spánia, Duiskkas ja Nuortariika).

– Muhtin riikkat gáibidit visuma. Iskka riikka ambassádas dieđuid dan birra.

– Váldde kopiija pássa identifikašuvdnasiiddus. Dat sáhttá boahtit ávkin jus pássa láhppo mátkkis.

Dáhkádus:

– Mátkedáhkádus lea vuogas go vuolggát mátkkoštit. Iskka maid du mátkedáhkádus gokčá.

– Geahča makkár njuolggadusat leat jus leat diŋgon páhkkareaissu (girdi ja orrunbáiki ovtta diŋgojumis).

– Jus girdi maŋŋona man nu geažil, de leat rievttit mat gusket mátkkošteddjiide.

Dearvvašvuohta:

– Iskka makkár boahkuhemiid dárbbašat buori áiggis ovdal vuolggát. Leat muhtin riikkat mat gáibidit ahte leat boahkuheami ožžon ovdal boađát.

– Jus buohccát, de lea buorre jus dus lea mátkedáhkádus. Iskka lea go fievrrideapmi ruoktot oassin du dáhkádusas.

– Váldde mielde dárbbašlaš dálkasiid, čalbmelásiid/linssaid ja smávva álgoveahkkepáhka.

– Lea dehálaš ahte geavahat áfáiduhttinvuoidasa. Rámbuvrrain girdihámmanis lávejit buori vuoidasat vuovdimassii.

Gálvu:
 

– Ale bija bastilis dahje čohka ávdnasiid veskui dahje lávkii maid válddát mielde girdái sisa. Jus dus leat hui dehálaš dálkasat maid dárbbašat jođánit de berret daid váldit mielde girdái.

– Iskka man lossa gálvu dus lea diŋgojumis, muđui sáhttá mátki šaddat liiggás divrras.